No Rosal representarase “A tarabela ambulante: idea” ás 18:00 na Praza do Calvario, e en Soutomaior “Castelao” á mesma hora no Multiúsos de Arcade
+Escénicas é o circuíto da institución provincial que leva unha completa programación de teatro e danza aos concellos de menos de 20.000 habitantes
A Deputación de Pontevedra leva este domingo 25 de maio o circuíto +Escénicas aos concellos do Rosal e de Soutomaior da man de dous espectáculos infantís e familiares: “A tarabela ambulante: idea”, a cargo de Tarabela Creativa, e “Castelao”, promovido por Culturactiva Producións, respectivamente. Trátase de dúas actuacións enmarcadas na segunda edición desta iniciativa provincial, que apoia a programación de teatro e danza nos concellos de menos de 20.000 habitantes da provincia cun orzamento de 195.000 euros, 45.000 euros máis que na súa primeira convocatoria.
“A tarabela ambulante: Idea” representarase na Praza do Calvario ás 18:00 horas e afonda en que pasaría se deixásemos entrar ao aburrimento, se os nenos non tiveran nin pantallas nin xoguetes e non houbera nada concreto que facer: que as súas mentes poñeríanse a buscar. A función conta a historia de Mariña, unha nena que grazas ao aburrimento se converte en Idea. O seu pensamento ten a forma dunha tarabela de cores, e cada vez que xira vánselle ocorrendo ideas mentres xoga. O espectáculo transmite que o aburrimento é un ben necesario na educación da infancia, pois é un caldo de cultivo para a súa creatividade, para aprender a estar consigo mesmos e un impulso prosocial.
“Castelao” representarase no Multiúsos de Arcade tamén ás 18:00 horas e ambiéntase nas horas antes de que Castelao partise desde Rianxo cara á Arxentina cando tiña só nove anos. Da man de Baltasara (unha personaxe misteriosa pero moi coñecida por toda a veciñanza da vila natal de Castelao) comezará un percorrido emocionante, condicionado pola urxencia e a inminencia da viaxe. Durante o espectáculo, protagonizado por Mónica Caamaño e Cris Collazo, o neno Castelao debe resolver co seu enxeño e dialéctica os misterios da vila mariñeira.
Co circuíto +Escénicas, a Deputación dá resposta á demanda que o sector profesional vén facendo desde fai máis de 15 anos. Tralo éxito da primeira edición, entre abril deste ano e marzo do seguinte representaranse un total de 136 funcións, escollidas entre un catálogo de espectáculos dispoñible no sitio web da Deputación de Pontevedra, en 50 concellos da provincia de Pontevedra.
