― Ademais, proseguirase con estas tarefas noutras 7 vías autonómicas, no seus percorridos polos municipios de Crecente, Moaña, Cangas, Teo, Narón, San Sadurniño, O Saviñao, Viveiro, Xove e Castrelo de Miño
― Estas actuación forman parte do contrato con Seaga para o control da biomasa das marxes das vías da Xunta, cun investimento de 4 M€ en dous anos
A Consellería de Vivenda e Planificación de Infraestruturas iniciará mañá, luns os traballos de limpeza e roza nas marxes da estrada autonómica PO-226, ao seu paso polo concello de Moraña.
Ademais destas tarefas na citada vía autonómica, na provincia de Pontevedra proseguirán os traballos iniciados fai tres semanas na PO-801, en Crecente; así como tamén as intervencións en execución na comarca do Morrazo: na autovía AG-4.6, e en distintos tramos da vía de alta prestacións CG-4.1, que une os municipios de Moaña e Cangas.
No caso da provincia da Coruña continuarán os traballos na autovía AG-59 en Teo; e na AG-64, nos concellos de Narón e de San Sadurniño.
Tamén continúan na provincia de Lugo os traballos na vía autonómica LU-616, no Saviñao; e na vía de altas prestación CG-2.3 no seu percorrido polos municipios de Viveiro e Xove.
Seguirán, ademais, as intervención que están en marcha na estrada OU-402, no concello ourensán de Castrelo de Miño.
Seguridade viaria
Todas estas intervencións consisten na limpeza e roza de vexetación na zona de dominio público das estradas de titularidade da Xunta, e na reposición ou reparación de elementos de valado perimetral das estradas autonómicas ou no acondicionamento de zonas verdes en sendas peonís e glorietas.
A Xunta, con este programa, segue a intensificar as súas accións para previr o risco de lumes e contribuír ao reforzo da seguridade viaria mediante o aumento da visibilidade e as accións para facilitar o tránsito de peóns e ciclistas.
Estas intervencións do departamento que dirixe María Martínez Allegue están enmarcadas no novo contrato coa empresa pública Seaga para o control da biomasa das marxes das estradas autonómicas, que conta, tralo recente incremento de 1 M€; cun investimento total de 4 M€ para os dous próximos anos.
