- O conselleiro de Presidencia, Xustiza e Deportes, Diego Calvo, lembrou que o Goberno galego vén de publicar as axudas deste ano por importe de 500.000 euros e con achegas de ata 10.000 euros
- A orde impulsa a compra de vehículos de taxi adaptados, de emisións cero e ECO
O conselleiro de Presidencia, Xustiza e Deportes, Diego Calvo, acompañado da directora xeral de Mobilidade, Judit Fontela, comprobou co presidente da Federación de Autónomos do Taxi de Galicia (Fegataxi), Ricardo Villamisar, e representantes da entidade, algúns dos vehículos adquiridos o ano pasado coas axudas da Xunta. Por iso, lles trasladou que poden presentar as súas solicitudes á convocatoria deste ano ata o 14 de outubro de 2025.
A través da orde do ano pasado, a Xunta financiou a adquisición de máis de 180 vehículos:27 vehículos adaptados, 146 taxis de baixas emisións e 8 vehículos de emisións cero.
Diego Calvo incidiu en que Goberno galego apoia desde hai anos aos profesionais do taxi, un sector que en Galicia dá emprego a preto milleiros de familias, conta con máis de 3.000 licenzas e presta un servizo esencial. Nesta liña, con estas axudas asegurou que se pretende contribuír a garantir unha mobilidade accesible e sostible no transporte público.
O conselleiro de Presidencia lembrou que a Xunta publicou o pasado 5 de decembro as axudas para a adquisición de vehículos taxi adaptados a persoas con mobilidade reducida (Eurotaxi), de emisións cero e do tipo ECO, que conta cun orzamento de 500.000 euros para este 2025. Deste total, 290.000 euros van dirixidas á liña para taxi adaptado, con achegas de 10.000 euros por vehículo; 68.000 para taxi emisión cero, con axudas de 4.000 euros; e 142.000 para vehículos taxi ECO, por importes de 1.000 euros.
A medida vai dirixida ás persoas físicas titulares de autorizacións administrativas de transporte vixentes, documentadas en tarxetas da serie VT-N expedidas pola Dirección Xeral de Mobilidade ou os servizos de Mobilidade competentes.
No caso das liñas de taxi de CERO emisións e ECO, a orde axudas cubre a adquisición de vehículos realizada desde o 1 de maio do ano pasado ata a data límite para xustificar a axuda, o 31 de outubro de 2025. Para a liña Eurotaxi, subvenciónanse tanto os vehículos xa adquiridos en calquera momento, co compromiso de manter a titularidade e a actividade ao menos cinco anos, como os que se adquiran con posterioridade á presentación da solicitude e á data límite para xustificar a axuda.
