A Xunta de Galicia presentará en Madrid a súa oferta de festivais, concertos e grandes espectáculos enmarcados nos Concertos do Xacobeo que terán lugar durante este 2025 e que contribúen a posicionar Galicia como sede referente no norte peninsular deste tipo de grandes eventos.
Nun acto que terá lugar na Casa de Galicia en Madrid o xoves 22 de maio, o Goberno galego presentará a oferta turística de lecer que complementará con outros atractivos como as citas gastronómicas e tamén destacará a bonanza climática dunha comunidade que non acostuma a sufrir os rigores dunha calor extrema.
No mesmo, porase en valor a creación e a música que se fai na Comunidade coa participación musical de Luz Casal e Xosé Manuel Budiño, ademais dunha mesa redonda con participantes que disertarán sobre o éxito dos festivais desde diferentes visións.
Xa pola noite, o Teatro Eslava acollerá un concerto a cargo de Xosé Manuel Budiño, Señora Dj, Carlos Ares e Xoel López, toda un adianto das citas musicais do próximo verán en Galicia.
O programa Concertos do Xacobeo regresa este 2025 cun programa amplo e plural, que apoia os principais eventos musicais da comunidade. En total serán máis de 60 eventos e 500 bandas e artistas imprescindibles da escena musical internacional, nacional e galega, que visitarán Galicia ao longo de todo o ano.
