― Actuarase nun treito de 300 metros da vía principal do municipio, desde a intersección que dá acceso á Casa do Concello ata o límite do núcleo urbano
― Renovaranse as beirarrúas e adaptaranse á nova normativa de accesibilidade, rehabilitando o firme dos carrís de circulación
― A Consellería de Infraestruturas e Mobilidade prevé comezar as obras no outono, cun prazo de execución de 6 meses, para que estean concluídas na primavera do 2023
― A actuación permitirá facilitar a mobilidade no acceso dos veciños ao Consistorio, á biblioteca pública, á escola de música e a establecementos como a panadería
― Aproveitarase a obra para intervir nos servizos de abastecemento e saneamento, construíndo unha liña exclusiva para canalizar a auga de chuvia e separala das fecais
― Tamén se renovará a iluminación e procederase ao soterramento das liñas eléctricas e de telecomunicacións, completándose a intervención coa instalación de mobiliario urbano e axardinamento para humanizar este treito de travesía
A Consellería de Infraestruturas e Mobilidade recibiu as ofertas de 8 empresas para executar as obras de renovación das beirarrúas da estrada PO-226, que suporán un investimento de máis de 387.000 euros.
A Xunta prevé adxudicar as obras no mes de setembro e empezar a traballar sobre o terreo no outono, co obxectivo de telas rematadas na primavera do 2023, xa que contan cun prazo de execución de seis meses.
Con esta actuación, o departamento de Infraestruturas da Xunta trata de facilitar a mobilidade dos veciños de Moraña, para o que se intervirá nun treito estratéxico desta vía autonómica, coincidente co núcleo de Santa Lucía, na parroquia de Saiáns, onde está situada a Casa do Concello, a biblioteca pública e a escola municipal de música, ademais de diferentes establecementos comerciais, como a panadería.
Máis en detalle, intervirase nun treito de 300 metros da estrada PO-226, desde a intersección que dá acceso ao Consistorio ata a chegar ao límite do casco urbano, onde as beirarrúas se atopan deterioradas debido ao esgotamento da vida útil do pavimento. A Xunta vai actuar, renovándoas e adaptándoas á nova normativa de accesibilidade.
O proxecto deseñado pola Xunta abrangue as dúas marxes do que é a principal vía do municipio, renovando as beirarrúas, facéndoas accesibles e ampliando o seu ancho nun treito da marxe esquerda para facilitar o tránsito dos peóns.
Xunto con isto, está prevista a rehabilitación do firme dos carrís de circulación, o que favorecerá tamén o tránsito dos vehículos en boas condicións.
Nesta actuación aproveitarase para intervir nos servizos de abastecemento, saneamento e pluviais, impulsando unha importante mellora, ao construír unha liña exclusiva para canalizar a auga de chuvia e separala das fecais, dotando este treito dunha rede de saneamento separativa.
Ademais, renovarase a iluminación e procederase ao soterramento das liñas eléctricas e de telecomunicacións, executando un prisma para estes servizos.
A actuación completarase coa instalación de mobiliario urbano e axardinamento para humanizar este treito de travesía de PO-226, que constitúe o corazón do municipio e que vai gañar, con esta actuación, espazo público para o desfrute dos veciños.
O departamento que dirixe Ethel Vázquez segue traballando para responder ás necesidades do rural con obras e servizos importantes para mellorar a calidade de vida de moitos galegos. Neste caso, trátase de facilitar que os veciños de Moraña poidan realizar os seus desprazamentos máis habituais en condicións de seguridade e de comodidade.