—A directora da oficina da Fundación Galicia Europa na capital comunitaria, Ana Ramos, reuniuse con familiares e o avogado do mozo galego asasinado en Filipinas en 2020
—Foi no marco dunha visita a Bruxelas para reclamar o apoio das institucións comunitarias e axilizar a resolución do caso
A directora da oficina de Bruxelas da Fundación Galicia Europa, Ana Ramos, reuniuse coa familia e o avogado de Diego Bello, o mozo empresario galego asasinado en Filipinas en xaneiro de 2020.
A representante da Xunta na capital comunitaria trasladoulle a solidariedade do Goberno galego na súa pretensión de acadar o apoio da Unión Europea para reclamar maior celeridade na resolución do caso.
Coa súa visita a Bruxelas, os familiares e o letrado de Diego Bello buscan que a UE exerza toda a súa influencia nas relacións con Filipinas, máis alá do ámbito comercial, para garantir a protección da cidadanía europea no país asiático e o cumprimento dos dereitos humanos.
Nestes momentos, a UE negocia un tratado de libre comercio con Filipinas. A súa axenda completouse con encontros con diferentes membros do Parlamento Europeo e unha representante da Comisión.
