O orzamento para o vindeiro ano do organismo de conca autonómico inclúe un ambicioso programa de acción que permite abordar os retos actuais e os futuros na xestión do ciclo da auga
A conselleira de Medio Ambiente e Cambio Climático, Ángeles Vázquez, puxo hoxe en valor o esforzo que realiza Augas de Galicia por reducir a pegada hídrica na Comunidade e contribuír ao obxectivo de neutralidade climática.
Durante a súa intervención no Consello Reitor de Augas de Galicia, a conselleira incidiu en que unha correcta xestión da auga é vital para avanzar no cumprimento dos obxectivos de desenvolvemento sostible (ODS) marcados a nivel global pola chamada Axenda 2030. Nese senso, cómpre lembrar que na Comunidade destaca, especialmente, a evolución no apartado de Auga limpa e saneamento (ODS número 6).
De feito, no caso do saneamento das augas, esta meta dáse por conseguida grazas a medidas impulsadas pola Xunta como os Plans de xestión da auga de Galicia para acadar servizos de subministración e depuración axeitados e equitativos ou outros documentos de planificación para facer fronte a aspectos como a seca, o risco de inundacións ou o aproveitamento hidroeléctrico dos recursos naturais.
E para seguir consolidando a Galicia verde e sostible que centra a acción transversal da Xunta, o orzamento para o vindeiro ano do organismo de conca autonómico inclúe, tal e como aseverou Ángeles Vázquez, un “ambicioso programa de acción que permite abordar os retos actuais e os futuros na xestión do ciclo da auga”.
Nesa liña, a conselleira subliñou que Augas de Galicia contará cun orzamento de 144 millóns de euros para continuar a traballar na mellora deste recurso fundamental para o territorio. Así, entre outras cuestións, levarase a cabo un importante investimento en saneamento e abastecemento a través da mellora das infraestruturas, a execución de políticas activas de resposta ante o cambio climático e a formación e divulgación para concienciar sobre unha xestión eficiente da auga tanto para os xestores profesionais como para a cidadanía en xeral.
A maiores, logo de incidir na aposta do Goberno galego polo desenvolvemento de infraestruturas no rural e por seguir avanzando no saneamento das rías, a conselleira fixo fincapé no impulso que se dará o vindeiro ano ás infraestruturas verdes co deseño de zonas de inundación controlada. De feito, esta mesma semana o Consello da Xunta autorizou destinar 2 millóns de euros para redactar os primeiros proxectos nese eido.
