- O paro diminuíu no último ano nas catro provincias e nas sete grandes cidades, en todos os sectores de actividade e entre os menores de 30 anos, os parados de longa duración e as mulleres, neste último caso coa cifra máis baixa da serie histórica
- A Comunidade galega conta con 1.079.573 persoas afiliadas á Seguridade Social, un nivel superior ao reflectido hai 16 anos
Galicia pechou o ano 2024 con 118.838 persoas no paro, a cifra máis baixa nun mes de decembro desde que hai rexistros (1996), e acumula 17.290 novas afiliacións á Seguridade Social en relación con decembro de 2023. O dato de persoas desempregadas sitúanos ademais como a terceira Comunidade con maior porcentaxe de caída no último ano, cun recorte tanto na evolución anual como na mensual (-8,24% e -2,39%) que supera en ambos casos a media estatal (-5,42% e -0,98% respectivamente). Así o destacou hoxe o conselleiro de Emprego, Comercio e Emigración, José González, durante a valoración dos datos de paro e de afiliacións do pasado mes de decembro.
En relación coa comparativa interanual, José González salientou que o desemprego cae nas catro provincias galegas, nas sete grandes cidades e en todos os sectores de actividade, liderando a baixada a agricultura (-14,07%) seguida da construción (-12,63%).
Tamén se reduce o paro nos colectivos prioritarios nas políticas activas de emprego da Xunta como os menores de 30 anos, as mulleres e os parados de longa duración. Así, a cifra de desempregados con menos de 30 anos (13.101) é a máis baixa nun decembro desde que hai rexistros e a de mulleres desempregadas (68.160), a máis baixa de toda a serie histórica (desde 2005). Canto ao dato de parados de longa duración (59.725), cae un -7,80% con respecto a hai un ano, mellorando o dato de decembro de 2008.
Canto ás afiliacións á Seguridade Social, o titular de Emprego salientou que Galicia pechou o mellor mes de decembro desde 2008, acadando os 1.079.573 cotizantes que supoñen un aumento con respecto a hai un ano dun 1,63% (17.290 novas afiliacións).
Sobre a contratación, aumenta en Galicia na comparativa anual nun 7,02%, máis dun punto por riba da media estatal, que logra un incremento do 5,96%. Así, na nosa Comunidade asináronse 3.420 contratos máis ca en decembro de 2023. Sobe tanto a contratación indefinida (un 8,32%) como a de xornada completa (un 5,96%).
Vistos os datos, o conselleiro concluíu a tendencia positiva e comprometeu o traballo da Xunta da man do empresariado e tecido produtivo galego de cara a seguir avanzando nun mercado laboral dinámico, inclusivo e de máxima calidade.
