— En colaboración coa Federación Empresarial Hoteleira Gastronómica de Arxentina (FEHGRA) realízase estes días formación específica para profesionais do país
— É froito da colaboración emprendida entre Turismo de Galicia e esta Federación desde o ano 2018 para exportar os métodos formativos do CSHG
Un grupo de 20 directivos dalgunhas das principais cadeas hoteleiras de Arxentina están a recibir estes días formación específica no Centro Superior de Hostelería de Galicia, no marco da colaboración que Turismo de Galicia leva a cabo coa Federación Empresarial Hoteleira Gastronómica da República Arxentina (FEHGRA) desde hai anos para a capacitación dos seus directivos.
Con estes 20, son xa máis dun centenar os profesionais arxentinos de alta dirección que leva formando o Centro Superior de Hostelería de Galicia desde o ano 2018 no seu compromiso por exportar e compartir o seu modelo formativo tamén no eido internacional. O xerente de Turismo de Galicia, Antonio Casas, e o director do Centro Superior de Hostelería de Galicia (CSHG), Jose Paz, recibiron os participantes xunto á responsable de capacitación do FEHGRA, Belén García Bertone.
Ata o venres 26, os profesionais de Río Negro, Neuquen, Entre Ríos, Salta, San Luis, Chaco, Formosa, Chubut, Tierra del Fuego, Buenos Aires, Córdoba, Santa Fe, Mendoza ou Misiones formaranse a cargo de profesorado do Centro Superior de Hostelería de Galicia.
As actividades están orientadas a profesionais e xerentes de establecementos hoteleiros pertencentes a algunha das máis de 50 entidades asociadas a FEHGRA en todo o país. O curso está a combinar sesións teóricas con desenvolvementos prácticos, en exercicios individuais ou colectivos e actividades complementarias. Conta con módulos en explotación hoteleira, xestión financeira do negocio hoteleiro e xestión de recursos humanos no hotel. Tamén se incluiu, como novidade este ano, formación de Revenue Management e Optimización da Xestión de Alimentos e Bebidas en hotel.
A Federación Empresarial Hoteleira Gastronómica da República Arxentina representa toda a actividade do país. O seu obxectivo é defender os intereses do sector e colaborar no desenvolvemento da hostelería, gastronomía e o turismo. A día de hoxe agrupa máis de 84.000 empresas.
