- Con motivo do Día Mundial da Asma, o martes 7 de maio, a partir das 13:30 horas, celébrase a I Xornada de Concienciación da Asma Grave, que leva por título Achegándonos á patoloxía dende unha unidade de asma grave
- O Complexo Hospitalario Universitario de Pontevedra (CHUP) conta coa única Unidade de Asma multidisciplinar acreditada pola Consellería de Sanidade
- Na actualidade, están en seguimento arredor de 1.000 pacientes con asma da Área Sanitaria de Pontevedra-Salnés, dos que uns 100 toman fármacos biolóxicos
O vindeiro martes, día 7 de maio, conmemórase o Día Mundial da Asma, unha enfermidade que afecta arredor do 10% da poboación adulta dos países occidentais e ata un 15% da infantil. Con motivo desta efeméride, a Área Sanitaria de Pontevedra e O Salnés, a través do seu Servizo de Pneumoloxía, organiza a I Xornada de Concienciación da Asma Grave, unha actividade de portas abertas a todo o público que terá lugar nesa mesma data, a partir das 13:30 horas, no salón de actos do Hospital Montecelo.
Este simposio terá formato de ‘mesa redonda’ e leva por nome Achegándonos á patoloxía dende unha unidade de asma grave. A presentación correrá a cargo do xefe de Sección de Pneumoloxía do Complexo Hospitalario Universitario de Pontevedra (CHUP), o doutor Adolfo Baloira, que ao mesmo tempo é responsable da Unidade de Asma. En canto aos poñentes, participarán na mesa o doutor Christian Anchorena, facultativo do Servizo de Pneumoloxía; a doutora Tania Liñares, do Servizo de Alerxia; e o doutor Carlos Crespo, xefe do Servizo de Farmacia.
Foro de encontro profesionais-pacientes
Cómpre salientar que esta I Xornada de Concienciación da Asma Grave pretende ser un foro de encontro entre profesionais e pacientes. Pola súa parte, os especialistas falarán dun xeito xeral da patoloxía da asma grave e do funcionamento da Unidade Multidisciplinar do CHUP. E pola parte dos doentes, contarase coa colaboración de enfermos que aportarán a súa experiencia cos tratamentos aplicados na actualidade.
O Complexo Hospitalario Universitario de Pontevedra (CHUP) conta coa única Unidade de Asma multidisciplinar acreditada pola Consellería de Sanidade dentro da rede de hospitais públicos de Galicia. Leva en funcionamento catro anos e, na actualidade, ten en seguimento arredor de 1.000 pacientes con asma grave. Deses, uns 100 doentes está a tratamento con algún fármaco biolóxico.
O doutor Adolfo Baloira explica que a asma é unha enfermidade que produce moita sintomatoloxía e dificultade respiratoria, con crises que aparecen de súpeto, de xeito impredicible. De feito, aínda na actualidade esas crises de asma poden ser causa de morte, pero, matiza o especialista do CHUP, “son evitables” grazas a que existen “excelentes tratamentos para asmáticos, entre eles os fármacos biolóxicos, que actúan bloqueando receptores celulares moi concretos, co que practicamente non teñen efectos adversos”.
