― A secretaria xeral da Igualdade, Susana López Abella, asistiu hoxe á xuntanza da primeira mesa de coordinación contra a violencia de xénero do concello ourensá na que se debateron novas actuacións para previr e atallar esta lacra social
― Destacou o papel fundamental destes órganos para a detección precoz de situacións de violencia e na resposta áxil ás mesmas
― O Goberno galego quere potenciar o desenvolvemento destes órganos nos 218 concellos que integran a Rede de entidades locais contra a violencia de xénero
A secretaria xeral da Igualdade, Susana López Abella, participou hoxe na I mesa local de coordinación contra a violencia de xénero de Pereiro de Aguiar onde se abordaron, entre outras cuestións, as propostas de novas actuacións para previr e atallar a violencia de xénero e se avaliou a situación actual no concello e as actuacións desenvoltas por parte das institucións e entidades convocadas á reunión.
O obxectivo destas mesas é o de promover, no ámbito municipal, políticas e actuacións de cara á erradicación desta lacra. A secretaria xeral destacou, así, o papel fundamental que desenvolven sobre todo na “detección precoz dos casos de violencia de xénero” e “na resposta áxil” ás vítimas. Non menos importante, subliñou, é a contribución destes órganos á sensibilización, no eido local, en materia de igualdade.
Nas mesas locais están representados todos os ámbitos municipais implicados, directa ou indirectamente, na loita contra a violencia de xénero. Para a secretaria xeral da igualdade, estes órganos constitúen exemplo da suma de esforzos das diferentes administracións, como a autonómica e a local, na prevención e erradicación da violencia de xénero. Son fundamentais, segundo expresou, para artellar medidas de sensibilización, asesoramento, atención e protección ás mulleres que a sofren, e tamén para procurar medios axeitados a cada caso.
É obxectivo da Xunta intensificar o traballo das mesas locais contra a violencia de xénero nos concellos que xa están constituídas e axudar á súa creación naqueles municipios nos que aínda non existen.
Esta posibilidade está aberta aos 218 concellos que integran a Rede de entidades locais contra a violencia de xénero. Para favorecela, a Secretaría Xeral da Igualdade ten ao seu dispor cadanseus manuais de apoio, unha guía de carácter práctico para a constitución das mesas locais de coordinación interinstitucional contra a violencia de xénero; e unha segunda guía dirixida á dinamización dos órganos existentes.
