O alumnado de Primaria e Secundaria do CPI de Ponte Carreira participaron esta mañá nunha xornada de sensibilización dentro da campaña de implantación do punto móbil nos concellos de Frades e Mesía. Unha actividade na que tamén participou o concelleiro de Ensino, Manuel Ferreiro Marzoa, quen explicou á rapazada os beneficios dunha correcta separación de refugallos en orixe para a súa posterior reciclaxe.
O funcionamento do punto limpo móbil é sinxelo: un camión despraza ata o lugar desexado unha plataforma que está dividida coas diferentes fraccións que se poden reciclar: pequenos electrodomésticos, pilas, papel, vidro… Este camión permitirá que o punto limpo vaia rotando por todas as parroquias de ambos os dous concellos.
De feito, unha vez rematada a presentación en Ponte Carreira, o punto limpo móbil desprazouse ata Mesía, onde tamén se desenvolveron charlas formativas para o alumnado do EEI Visantoña. Xa pola tarde, repartirase información sobre o punto limpo móbil entre os comercios do municipio de Mesía.
Este punto limpo móbil Frades-Mesía é un dos concedidos pola Consellería de Medio Ambiente, Territorio e Vivenda en 2021. O Departamento dirixido por Ángeles Vázquez achegou aos concellos de Frades e Mesía unha axuda de case 70.000 euros para a prestación deste servizo mancomunado, que complementará o servizo que presta o punto limpo posto en marcha en Céltigos grazas a unha achega autonómica de 276.000 euros.
