— Feijóo reuniuse co director xeral e outros dous representantes da firma Lonza Biologics Porriño S.L.
— A empresa investirá máis de 5,4 millóns de euros na adquisición de catro parcelas e converterase na quinta firma que se asentará na Plataforma loxística e industrial de Salvaterra-As Neves
— Aínda están dispoñibles máis de 134.000 m2 urbanizados, que se poden adquirir en réxime de compravenda ou dereito de superficie
O presidente da Xunta, Alberto Núñez Feijóo, e a conselleira Medio Ambiente, Territorio e Vivenda, Ángeles Vázquez, reuníronse esta semana co director de Lonza Biologics Porriño S.L, Keith Dailey, co que abordaron a incorporación da empresa á Plataforma Loxística e industrial de Salvaterra-As Neves (Plisan).
Lonza investirá máis de 5,4 millóns de euros na adquisición de catro parcelas, en réxime de dereito de superficie, e converterase así na quinta firma que se asentará na Plisan. Trátase da maior adxudicación de superficie de solo empresarial asignada ata o momento na Plisan, 102.000 metros cadrados.
Anteriormente, a conserveira Hijos de Carlos Albo adquirira 63.000 m2 cun valor de case 3,3 millóns de euros en novembro de 2020; a tecnolóxica BETA Implants, pertencente a Arbinova, se fixera con 5.200 m2, cun prezo de 371.000 €, entre marzo de 2021 e o pasado xaneiro; este mesmo mes, a conserveira Frinsa adquiriu de xeito directo 41.000 m2 por 2,2 millóns de euros e a empresa de augas Gainser sumou 2.650 m2 por 190.000 euros.
Deste xeito, confírmase o bo momento da Plisan e o efecto chamada de empresas, tal e como demostra o feito de que chegasen tres firmas no que vai de mes. Así, a superficie total adxudicada xa ascende a 214.000 m2, cun prezo global de adquisición de 11,23 millóns de euros.
Non obstante, aínda están dispoñibles máis de 134.000 m2 urbanizados —31 parcelas—, que se poden adquirir en réxime de compravenda ou dereito de superficie, neste segundo caso cun canon moi reducido. O procedemento para adxudicación directa atópase aberto ata o vindeiro 30 de abril.
Cómpre lembrar que os promotores da Plisan son a Xunta, a Autoridade Portuaria de Vigo e o Consorcio da Zona Franca de Vigo. Unha vez rematen as actuacións actuais, o investimento neste ámbito ascenderá xa a preto de 235 millóns de euros.
Entre as intervencións máis recentes, destaca o remate, o pasado mes de decembro, da obra da estación de tratamento de auga potable (ETAP), executada pola Xunta cun investimento de 5,2 millóns de euros; e da actual adecuación de todas as subministracións de servizos —gas, grupos electróxenos, electricidade, etc.— na zona de comercialización.
A segunda localización de Lonza
Actualmente, Lonza, empresa do sector biotecnolóxico, conta cunha planta no polígono industrial de Torneiros (O Porriño), a uns 20 km da Plisan. Desde 2006, especializouse na fabricación a medida de proteínas recombinantes e anticorpos monoclonais terapéuticos para subministración clínica e comercial.
A compañía conta con ao redor de medio cento de empregados directos e nos últimos anos realizou investimentos en liña co seu compromiso coa sustentabilidade, para mellorar a súa eficiencia enerxética, e reducir o consumo de auga e a xeración de residuos.
