A área de turismo analiza os datos dunha tempada que supera todas as espectativas
O Concello de Cabanas, a través da área de turismo, vén de presentar os datos de visitantes da tempada, unhas cifras que amosan a consolidación dunha tendencia á alza no número de visitantes que se achegan a coñecer o concello, cun incremento do 42% neste 2022 con respecto ao ano 2021.
A Oficina de Información e Turismo (OIT), situada no Parque do Areal, atendeu 7274 persoas que se achegaron demandando información sobre Cabanas e a súa contorna, así como tamén polas actividades programadas desde o Centro de Interpretación do Medio Mariño (inaugurado esta tempada), os acceso e roteiros polas Fragas do Eume e a praia canina situada na Madalena.
“Os datos de visitantes son o resultado dunha planificación na que se ten en conta tanto a potencialidade do destino como a do sector local de turismo, co que este verán se levaron a cabo diversas actividades de promoción en conxunto”, sinalou o tenente alcalde e responsábel de turismo, Iago Varela, quen tamén destacou “a importante proxección de Cabanas en feiras e eventos do sector, como Fitur, Turexpo, Primavera no Camiño ou Equiocio, nas que se participa de forma activa”.
As visitas en datos
O 81% das visitantes que pasaron pola Oficina de Información Turística de Cabanas procedían de diferentes puntos do Estado español, destacando – por esta orde – o número de persoas chegadas desde Madrid, Andalucía, Galiza, Comunidade Valenciana e Castela A Mancha. Tamén destaca o crecemento nas procedencias desde as Illas Canarias.
Os número de visitantes internacionais medrou neste 2022 un 7% con respecto ao 2021. O 91% das visitantes estranxeiras proceden de Europa, de maneira significativa desde Italia, Portugal, Alemaña, Reino Unido e Francia, e por primeira vez desde que se teñen datos recíbense visitantes desde Oceanía.
En canto ao modo de viaxar, un 34% dos visitantes fíxoo cun grupo organizado de máis de 10 persoas, o 31,7% en parella ou familia e un 28,3% faino coas súas amizades. Tan só un 6% viaxa en solitario.
Para os desprazamentos, a meirande parte das visitantes elixiu o vehículo particular, ao tempo que continúa a tendencia crecente ao uso da autocaravana e furgonetas camperizadas para a mobilidade e aloxamento. As persoas que contrataron aloxamento, fixérono principalmente en hoteis e albergues, e en menor medida en aloxamentos turísticos.
