Juan Fariña, concelleiro de Alternativa en Bergondo, quere falar coa alcaldesa de Betanzos para facer presión ante a Xunta e adecuar mellor os horarios.
A falta de adecuación dos horarios de autobuses que atravesan Bergondo cara a Betanzos e que serven de medio de traslado a alumnas e alumnos dos institutos da cidade do Mandeo é un grave problema do que o concelleiro da Alternativa en Bergondo Juan Fariña quere falar coa alcaldesa de Betanzos. É importante que, aínda que os concellos non teñan competencia directa neste tipo de transporte comarcal, sirvan de plataforma para poñer na axenda informativa este tipo de problemas e exercer a presión necesaria para provocar unha mellora no servizo.
Fariña, concelleiro de Infraestruturas, Urbanismo e Medio Ambiente solicitou formalmente ver á alcaldesa brigantina, xa que “é o momento de que todos os concellos afectados e as distintas formacións políticas da comarca nos poñamos as pilas con relación a este problema e tentemos exercer a presión que a Xunta merece por culpa da súa inacción. É momento da aparcar as siglas e o cálculo electoralista e tentar resolver o problema, xusto o que nos reclama a cidadanía a todos nós”.
