Trátase de recursos do Plan Extraordinario de Infraestruturas Deportivas que distribuíu xa máis de 2,4 millóns de euros entre concellos da provincia de menos de 50.000 habitantes
A Deputación de Pontevedra acaba de aprobar unha nova axuda de preto de 30.000 euros ao abeiro do Plan Extraordinario de Infraestruturas Deportivas, dotado con 4 millóns de euros, para o Concello de Campo Lameiro. Con estes recursos, o Goberno local dotará o ximnasio municipal de novo material deportivo.
O Concello de Campo Lameiro destinará esta achega de 28.819 euros a equipar a instalación municipal, situada no pavillón anexo ao CEIP Pedro Antonio Cerviño. Desta maneira, adquirirán máquinas deportivas como bicicleta elíptica e estática, unha cinta de correr, barras de discos de diferentes pesos, pelotas saudables, bancos, colchonetas, discos olímpicos, bandas de resistencia, “steps”, agarres para poleas ou unha torre 4 estacións, entre outros elementos.
O Plan Extraordinario de Infraestruturas Deportivas da Deputación, dirixido aos 59 concellos da provincia de menos de 50.000 habitantes, mobilizou ata o momento máis de 2,4 dos 4 millóns de euros do orzamento total, con achegas, ademais de para Campo Lameiro, para A Cañiza, A Estrada, A Illa de Arousa, A Lama, Agolada, Arbo, As Neves, Baiona, Barro, Cangas, Catoira, Cerdedo-Cotobade, Covelo, Crecente, Fornelos de Montes, Gondomar, Lalín, Marín, Meaño Meis, Mondariz-Balneario, Moraña, O Rosal, Oia, Pazos de Borbén, Poio, Pontecesures, Redondela, Salceda de Caselas, Salvaterra de Miño, Silleda, Soutomaior, Tui, Valga, Vila de Cruces, Vilaboa, Vilagarcía e Vilanova.
