Organiza un acto para trasladar as súas 198 alternativas ao proxecto de contas de Abel Caballero para 2026 e seguir recollendo propostas da veciñanza e do tecido asociativo
Terá lugar este martes 11 de novembro, ás 19:30h, no Hotel Occidental (rúa Vía Norte 10)
Xabier P. Igrexas: “O BNG mantemos o compromiso de facer da participación das viguesas e vigueses e dos movementos sociais o motor do cambio que precisa a cidade”
O Bloque Nacionalista Galego (BNG) convoca en Vigo un Encontro Aberto por uns Orzamentos Participativos. A fronte nacionalista organiza —este martes 11 de novembro, ás 19:30h, no Hotel Occidental (rúa Vía Norte 10) — un acto para trasladar as súas 198 alternativas ao proxecto de contas de Abel Caballero para o ano 2026 e seguir recollendo propostas da veciñanza e do tecido asociativo.
“Frente a un Goberno municipal instalado na xordeira autoritaria, o BNG queremos servir de ferramenta para lograr que se escoiten as voces que Abel Caballero non quer ouvir”, destacou sobre o encontro o portavoz municipal, Xabier P. Igrexas, censurando que o proxecto de orzamentos do Concello para o vindeiro ano fose elaborado “en réxime de monólogo sen ningún diálogo”.
Igrexas defendeu a necesidade duns presupostos “de toda a cidade e para toda a cidade” que atendan as “necesidades reais” da cidadanía viguesa. “Para avanzar cara a un Vigo máis xusto e igualitario a nivel social, moito máis verde e habitábel, con máis e mellores servizo públicos, que acabe co abandono dos nosos barrios e parroquias e que poña fin ás políticas de desertización cultural e de castigo contra o deporte e a mocidade”, afirmou.
Nese sentido, puxo en valor o importante número de achegas e propostas do tecido asociativo e dos movementos sociais que incorporaron nas 198 emendas que rexistrou a fronte nacionalista proxecto de contas do Goberno local. “Con este encontro queremos dar un paso máis, desde a premisa de que os cartos do Concello non son de Caballero, senón das viguesas e dos vigueses”, subliñou o portavoz do BNG.
Con ese obxectivo, o Bloque convidou a todas as asociacións, colectivos e entidades da cidade, e chamou a participar a toda a veciñanza para “facer algo revolucionario en Vigo: escoitar e poñer en común”. No encontro, a fronte nacionalista quere explicar a súa valoración dos orzamentos de “máis do mesmo” de Caballero e presentar as súas 198 emendas rexistradas, así como seguir recollendo propostas para levar ao Pleno.
Un acto co que o Bloque quere dar continuidade ao proceso de diálogo iniciado o pasado mes de xuño co Debate Veciñal do Estado da Cidade. “Desde o compromiso de facer da participación da veciñanza e dos movementos sociais o motor do cambio que precisa a cidade; para avanzarmos, xuntos e xuntas, na tarefa partillada de construírmos un novo Vigo, entre todas e para todos”, salientou Igrexas.
