• Marta Lucio xa rexistrou unha moción para reclamar mañá no pleno municipal que desista de recorrer o fallo do xuíz porque esa decisión supón un gasto máis para o Concello de Meis.
• Ademais, proporá que sexa a próxima corporación municipal, saída das urnas, a que decida si o servizo de lixo debe ser mancomunado ou municipal, e que os tres partidos asuman o compromiso de seguir mantendo as taxas de lixo conxeladas para os veciños.
O Partido Popular de Meis rexistrou unha moción para solicitar no pleno municipal que se celebra mañá que a alcaldesa, Marta Giráldez, desista de recorrer o fallo do xuíz que anulou a modificación do contrato de recollida do lixo, “porque esa decisión supón un gasto a maiores para o Concello de Meis e prexudicará aínda máis aos veciños”. Do contrario, a voceira popular e candidata á alcaldía, Marta Lucio, esixiralle “que sexa ela quen pague do seu peto o recurso da sentenza”.
Lucio lamenta a “absoluta falla de autocrítica” da rexedora, ao dicir que todo o proceso estivo ben feito “cando ten enriba da mesa unha demoledora sentenza en contra”. Para a candidata popular “é alucinante que a alcaldesa diga que facemos o ridículo cando é ela, que ademais é avogada, a que ten unha sentenza que lle di que fixo as cousas moi mal e o peor de todo é que segue obcecada co asunto en vez de admitir a realidade”.
Por iso, na moción que o PP defenderá no próximo pleno, ademais de pedir ao Goberno socialista que desista de recorrer a sentenza, tamén propoñen que sexa a próxima corporación municipal, a que saia elixida das eleccións municipais do 28 de maio, a que decida si o servizo de lixo do concello debe ser mancomunado ou si, pola contra, aposta porque sexa municipal.
E tamén buscarán o compromiso unánime dos tres grupos políticos para comprometerse a seguir mantendo as taxas do lixo conxeladas, porque o incremento de máis de 80.000 euros anuais no contrato actual é unha realidade. Lucio di, que “aínda que agora o agoche, o Goberno socialista quere subir as taxas para compensar o sobrecusto disparado que el mesmo xerou no servizo de limpeza”.
