A alcaldesa de Redondela, Digna Rivas, e o concelleiro de Ensino, Iván Valles, reuníronse hoxe en Pontevedra co xefe territorial de Ensino César Pérez Ares, para tratar as necesidades dos centros públicos do municipio. A Consellería de Educación vai levar a cabo investimentos por máis de 2,6 millóns de euros en nove centros educativos de Primaria e Secundaria. As obras previstas son a reformas no EEI A Marisma por importe de 67.853 euros (fontanería, falsos teitos e luminarias), no CEIP Laredo por valor de 36.000 euros (luminarias), no CEIP Quintela por 48.000 euros (aseos) e no CEIP Reboreda por 310.579 euros (carpinterías e melloras varias). No referente a Educación Secundaria, os investimentos serán no IES Illa de San Simón por importe de 69.195 euros (illamento térmico e acústico e instalación solar fotovoltaica), no IES Mendiño por 242.436 euros (instalacións térmicas) e no IES Pedro Floriani por 1.888.821 euros para a súa ampliación.
Durante a reunión falouse tamén sobre o convenio cos institutos do Concello para uso dos pavillóns polideportivos, a través do acordo coa Federación Galega de Municipios (FEGAMP), sobre as obras de reforma integral do CEIP Alexandre Bóveda. Desde o Concello de Redondela demándanse tamén obras de mellora para a eficiencia enerxética nos centros de Quintela e Cedeira.
Deficiencias no trasporte escolar
A alcaldesa insistiu na urxencia de dar resposta ás necesidades de transporte escolar dos institutos de Redondela, xa que son máis de 80 os alumnos e alumnas que carecen de servizo de autobús para desprazarse. Desde o Concello realizáronse os traballos técnicos para cubrir este servizo cun plan de transporte “que é unha prioridade para este goberno local”, sinala a alcaldesa Digna Rivas. Desde a consellería de Ensino trasladaron esta petición á Dirección Xeral de Mobilidade, responsable agora desta competencia para manter unha reunión urxente coa nova directora territorial, Blanca García-Señoráns. En todo caso, o Concello de Redondela, traballa xa con outras alternativas “para garantir o transporte do alumnado de bacharelato desde as diferentes parroquias aos institutos”.
