- O programa inclúe conferencias, exposicións, clases de autodefensa, contaconto, performance e obradoiros para o alumnado de institutos e colexios. A alcaldesa, Digna Rivas, salientou que desde o Concello “traballamos todos os días do ano na prevención da violencia machista”. Neste mes de novembro a programación refórzase aínda máis con actividades dirixidas especialmente ao alumnado dos institutos e colexios e tamén para o público en xeral.
- O lema deste ano, “Sempre hai saída” e a porta violeta que o representa “son un chamamento á liberdade, unha alegoría para que as vítimas busquen a axuda que precisan non só nas administracións ou entidades, senón na súa contorna, na súa familia e amizades, na veciñanza e na sociedade”, sinala Rivas.
Unha porta violeta presidiu este mediodía a presentación das actividades que organiza o Concello de Redondela este mes de novembro co gallo da celebración do 25N do Día Internacioal da Eliminación da Violencia contra a Muller. A alcaldesa, Digna Rivas, acompañada da concelleira de Igualdade Iria Vilaboa, o experto en seguridade dixital Javier Cancelas, e membros da asociación Andaina, deu conta da programación que comeza esta mesma semana. A rexedora salientou que desde o Concello “traballamos todos os días do ano na prevención da violencia machista, con actividades para darlle visibilidade a esta problemática e concienciar á sociedade”. Neste mes de novembro a programación refórzase aínda máis con actividades dirixidas especialmente ao alumnado dos institutos e colexios, “porque na educación está a base da prevención de conductas machistas” e tamén para o público en xeral.
O lema deste ano, “Sempre hai saída”, busca ser “unha porta aberta á liberdade, unha alegoría para que as vítimas busquen a axuda que precisan non só nas administracións ou entidades, senón na súa contorna, na súa familia e amizades, na veciñanza e na sociedade. Que nunca máis sexa tarde para cruzar a porta cara á liberdade”, sialou Rivas. Ese lema está representado nunha porta violeta que se instalará na praza do Concello e recollerá ao longo deste mes as mensaxes dos centros de ensino, centros de día e colectivos como Andaina e Lenda, que participan desta actividade. Colexios, institutos e outras entidades participantes na campaña terán tamén a súa propia porta, con material achegado polo Concello, para escribir as súas mensaxes. A concelleira Iria Vilaboa explicou que a boneca “Violeta” visitará os diferentes centros e asociacións para coñecer estas mensaxes. Tanto Rivas como Vilaboa agredeceron a todos os centros, colectivos e asociacións a súa participación “xa o obxectivo deste goberno é que toda a sociedade se implique na loita contra a violencia machista”. Agradeceron tamén a colaboración da concellería de Infraestruturas e Sostibilidade cuxos operarios se encargaron de realizar a porta violeta desta campaña.
PROGRAMACIÓN
Ao longo de todo o mes de novembro
- OBRADOIROS “FALEMOS DE SEXO” E “PREVENCIÓN TRASTORNOS DE CONDUTAS ALIMENTARIAS DENDE A PERSPECTIVA DE XÉNERO: VIOLENCIA ESTÉTICA”. Impartidos pola educadora Lucía Pereda (Talentea) para o alumnado dos IES e os centros escolares do concello.
Venres 15 novembro
- Conferencia “Amelia. Historia de una lucha”. Multiúsos da Xunqueira. 10:00 e 12:00 h. A cargo de Amelia Tiganus. Dirixida ao alumnado dos IES do concello.
- Exposición “Chicas Nuevas 24h”. Multiúsos da Xunqueira. 18:30 h. Dirixida por Mabel Lozano. Para o público en xeral.
- Conferencia “Xuventude, internet e violencia sexual: ¿quen gaña?”. Multiúsos da Xunqueira. 19:00 h. A cargo de Amelia Tiganus. Dirixida ao público en xeral.
Venres 22 novembro
- Conferencia “Violencia machista na contorna dixital”. Multiúsos da Xunqueira. 19:00 horas. A cargo de Javier Cancelas e Andrea González. Dirixida ao público en xeral.
Sábado 23 e 30 novembro
- “Formación en autodefensa”. Pavillón Municipal A Marisma. 10:00 h. Inscrición previa en igualdade@redondela.gal
Sábado 23 novembro
- Entrega galardón IV Premio Sesé Mateo de Xornalismo Ético no tratamento da violencia machista. Oficina de Turismo. 12:00 h.
Luns 25 novembro
- Acto institucional. Praza do concello. 12:00 h. Lectura da Declaración Institucional e a Performance “Sempre hai saída” de Neves Seara e Arancha Nogueira. Dirixida ao público en xeral.
- Lazo humano. Praza do Concello. 12:30 h. Foto conxunta coas persoas asistentes. Prégase asistir con camiseta negra.
Xoves 28 de novembro
- Contacontos “Aitana e a avoa, e outros contos violetas”. Multiúsos do Piñeiral, Chapela. 18:30 h. Con Soraya Lema. Para as crianzas de máis de 3 anos.
