- Ao longo desta semana o alumnado inicia o seu plan de formación práctica, no que rotarán por diversos servizos dos hospitais Provincial e Montecelo, o centro de especialidades de Mollabao e o centro de saúde de A Parda
- Este é o décimo ano que os centros sanitarios pontevedreses imparten esta formación completa a alumnos da Universidade de Santiago de Compostela
- Tamén esta mañá se lle deu a benvida ao alumnado de cuarto curso do Grao de Fisioterapia do campus de Pontevedra da Universidade de Vigo
A Área Sanitaria de Pontevedra e O Salnés recibiu hoxe no salón de actos do hospital Montecelo a 28 estudantes de sexto ano da Facultade de Medicina da Universidade de Santiago de Compostela, que inician o seu curso académico no Complexo Hospitalario Universitario de Pontevedra. Ao longo desta semana, estes alumnos comezan o seu plan de formación práctica, durante o que rotarán por diversos servizos especializados dos hospitais Provincial e Montecelo, polo centro de especialidades de Mollabao e polo centro de saúde de A Parda.
Divididos en dous grupos, estes 28 alumnos de sexto curso de Medicina levarán a cabo rotacións, regradas e obrigatorias, por servizos coma Urxencias, Cirurxía Xeral, Medicina Familiar, Rehabilitación, Nefroloxía, Psiquiatría, Pediatría, Obstetricia e Xinecoloxía, Psiquiatría, Pneumoloxía, Neuroloxía ou Medicina Interna, entre outros, sempre baixo a supervisión dos seus respectivos titores coordinadores, para, finalmente, ser avaliados ao remate do curso académico.
Décimo ano impartindo o último curso do grao de Medicina
Este é o décimo ano que o Complexo Hospitalario Universitario pontevedrés imparte de xeito completo o último curso do grao de Medicina, trala súa declaración coma hospital universitario a finais do ano 2012.
Grazas a este plan de formación, os estudantes benefícianse de poder realizar a totalidade do último curso de Medicina nun entorno sanitario de recoñecido prestixio, tanto polas instalacións coma polos profesionais, a través dun completo programa rotatorio de prácticas, no que contarán de xeito continuado co apoio dun titor.
Neste sentido, as liñas de traballo deste programa afondan nas competencias máis específicas, afianzando os coñecementos globais previos, acadando un maior aproveitamento dos recursos do Servizo Galego de Saúde e a homoxeneización da docencia no eido sanitario.
Benvida ao alumnado de Fisioterapia
Tamén esta mañá se lle deu a benvida no salón de actos do hospital Montecelo a un primeiro grupo de 42 alumnas e alumnos en prácticas de cuarto curso do Grao de Fisioterapia do campus pontevedrés da Universidade de Vigo. Nesta recepción, a unidade de Docencia organizou tres ponencias introdutivas de gran relevancia de cara ao seu exercicio profesional como son o compromiso de confidencialidade, o segredo profesional e a intimidade do paciente.
A Área Sanitaria de Pontevedra e O Salnés recibirá neste curso 2024/2025 preto de 150 estudantes de Fisioterapia en diferentes periodos, que realizarán as Estadías Clínicas nos tres hospitais da área de saúde así coma en centros de Atención Primaria. A finalidade deste período formativo é o de adquirir as competencias necesarias para completar o seu currículo universitario e obter a titulación que lles permitirá desenvolver a súa profesión sanitaria.
