• A adquisición responde á necesidade de dotar ao departamento medios materiais adecuados, o que permitirá mellorar a atención á cidadanía.
• A alcaldesa, Ana María López, destaca que “é unha ferramenta fundamental para reforzar a atención no noso municipio e contribuirá a garantir unha atención de calidade”.
O Concello de Cariño abriu o procedemento de licitación para a contratación da subministración dun vehículo destinado aos desprazamentos do persoal dos servizos sociais comunitarios. O prazo para a presentación de ofertas por parte das empresas interesadas finalizará o próximo 14 de maio.
A adquisición responde á necesidade de dotar ao departamento de servizos sociais de medios materiais adecuados, dado que actualmente non dispón dun vehículo propio para o desenvolvemento das súas funcións. O novo recurso permitirá mellorar a atención á cidadanía, facilitando desprazamentos máis áxiles e seguros para a prestación dos distintos servizos.
A alcaldesa de Cariño, Ana María López, destacou a relevancia deste investimento sinalando que “este vehículo é unha ferramenta fundamental para reforzar a atención social no noso municipio”.
Así mesmo, López subliñou que “permitirá chegar de forma máis rápida e eficaz ás persoas que o necesitan e contribuirá a garantir unha atención de calidade, próxima e adaptada ás necesidades da poboación”.
Especificacións técnicas
O contrato contempla a adquisición dun vehículo tipo turismo SUV ou todocamiño, novo ou de quilómetro cero, que cumpra cos requisitos técnicos e medioambientais establecidos nos pregos. Entre as condicións esixidas inclúense características orientadas a garantir a seguridade, a funcionalidade e a comodidade nos desprazamentos do persoal municipal.
Esta actuación conta con financiamento da Deputación dá #o Coruña, que concedeu unha subvención de 20.000 euros no marco do seu programa de apoio á adquisición de vehículos para servizos sociais municipais. O valor estimado do contrato ascende a 22.217,17 euros.
