A proposta da Alcaldía, o Concello valora cambios na expedición dos billetes que poderían aforrarlle cada ano medio millón de euros ás arcas municipais
Os grupos políticos municipais decidirán o martes día 9 de marzo cal será a fórmula de adquisición de novos vehículos para o servizo de transporte urbano para o Concello de Ourense. Así se acordou esta mañá nunha xuntanza dos portavoces dos grupos políticos municipais. Dada a necesidade de renovar o contrato de xestión do servizo municipal e da súa flota de autobuses, valóranse dous escenarios. Por unha banda, que o Concello adquira directamente 33 novos vehículos a adxudique, a través dunha concesión, a xestión do servizo. Por outra, realizar unha licitación conxunta, na que sexa a concesionaria a que adquira os autobuses para o Concello. A compra directa dos novos vehículos suporía un investimento duns 10 millóns de euros, con cargo ao remanente do Concello, e require dun acordo plenario para poder levarse a cabo.
Os grupos políticos debateron de novo o asunto esta mañá nunha xuntanza informal dos portavoces, na que se emprazaron ao martes, 9 de marzo, para tomar unha decisión, segundo explicou o alcalde de Ourense, Gonzalo Pérez Jácome, quen advertiu que esta “data límite” non se pode demorar, dados os prazos que son necesarios para licitar e adxudicar os contratos. “se licitamos no mes de maio ou xuño, os autobuses poderían estar aquí en outono de 2022, se todo sae ben”.
Por outra banda, a proposta da Alcaldía, o Concello valorará un cambio na expedición dos billetes do servizo de autobuses que poderían supoñer un aforro ao Concello de preto de medio de millón de euros ao ano. Consistiría a, basicamente en que sexa o Concello, e non a empresa concesionaria, a entidade que lle emita os billetes ás persoas usuarias dos autobuses. Esta fórmula permitiría que o Concello puidese desgravar o IVE destes ingresos, nun montante que se estima nuns 400.000 ou 500.000 euros ao ano. O alcalde solicitoulles aos servizos municipais que valoren esta proposta, dado o grande impacto que tería nunha concesión cun importante dotación económica e carácter plurianual.
Comisión de pleno
A próxima a sesión do pleno do Concello, correspondente ao mes de marzo, volverá ser telemática, dadas as restricións definidas pola Xunta de Galicia pola evolución da pandemia da COVID-19, publicadas no día de onte no Diario Oficial de Galicia.
Na xuntanza da comisión de pleno que se celebrou esta mañá, a proposta da Alcaldía de retribucións para a praza de director xeral de Servizos Xerais, Transparencia e Sistemas de Información foi ditaminada desfavorablemente, tras recibir os votos a favor de Democracia Ourensá, en contra de PsdeG-PSOE e PP, e as abstencións de C’s e BNG.
