Un total de 20 veciños e veciñas de Oleiros en situación de desemprego formaranse en carpintería e xardinería a partir do mes de xuño, durante 9 meses, percibindo un salario de 1.221 euros, máis as pagas extras. Ademais, tras finalizar a formación, terán un contrato nunha empresa por un prazo mínimo de 3 meses.
Será a través dun novo obradoiro de emprego promovido polo Goberno municipal para o que o Concello recibirá 411.928 euros da Consellería de Emprego, Comercio e Emigración da Xunta de Galicia. A achega municipal será de 40.980 euros.
Con este novo obradoiro, ademais de formar as 20 persoas participantes, procederase a diversos traballos de mantemento e mellora de xardinería e carpintería en distintos espazos públicos, entre outros no Bosque dos Veciños e no Pazo de Lóngora.
Esta mañá tivo lugar o acto oficial de inicio do obradoiro coa presenza do alcalde, Ángel García Seoane, a concelleira de Formación e Emprego, Teresa Vázquez, e a delegada da Xunta, Belén do Campo.
