Varios camións da recollida do lixo que presta o Consorcio das Mariñas na comarca levan semanas avariados perdendo lixo polas rúas, deixando un olor insoportable por onde pasan e esparcindo residuos e líquidos pestilentes mentres circulan. Ademais, a limpeza dos contornos de contedores tampouco se efectúa na frecuencia establecida por contrato nin se están a repoñer a maioría dos contedores rotos.
O Consorcio das Mariñas está a tolerar a vulneración sistemática das obrigas contractuais da empresa de recollida de lixo, que supoñen importantes beneficios económicos para a empresa concesionaria.
Por parte do Concello de Oleiros esixiráselle ao Consorcio das Mariñas que de inmediato se reparen os camións avariados e emita un informe sobre o actual funcionamento do servizo e os incumprimentos existentes para sancionar á empresa. Ante estes feitos, o presidente do Consorcio non se pode seguir mirando cara outro lado.
