A Comisión de Seguimento da N-550 levou a cabo hoxe a concentración con corte da circulación convocada no cruce co Camiño da Quiringosta para reclamar actuacións urxentes que melloren a seguridade nesta estrada estatal ao seu paso por Mos.
A concentración contou cun amplo respaldo institucional e social, coa participación de representantes de todos os grupos políticos con representación na Corporación municipal, ademais de membros da Comisión de Seguimento da N-550, colectivos veciñais, asociacións e veciñanza, que volveron a reclamar actuacións urxentes que melloren a seguridade nesta estrada estatal. A concentración celebrouse no punto onde, hai apenas uns días, unha peregrina resultou atropelada mentres cruzaba a N-550, un novo accidente que motivou esta mobilización.
A protesta chega trala reunión da Mesa do Camiño, na que participaron representantes do Xacobeo 2027, da Deputación de Pontevedra, do Concello de Mos e das entidades vinculadas ao Camiño Portugués. Durante o encontro abordáronse distintas alternativas para reforzar a seguridade na N-550, entre elas o estudo dun paso elevado ou inferior para os peregrinos, a solicitude da consideración de travesía urbana para determinados treitos da estrada ou a solicitude da instalación dun radar fixo limitado a 50 km/h nun dos puntos de maior risco. Tanto a Xunta como a Deputación trasladaron o seu apoio para seguir avanzando nestas propostas e recolleron a petición da alcaldesa de que exerzan como mediadores ante o Ministerio, así como a de colaborar na procura de solucións que permitan mellorar a seguridade viaria.
A alcaldesa de Mos, Nidia Arévalo, agradeceu a resposta da veciñanza e dos colectivos que participaron na mobilización e asegurou que “hoxe Mos deu unha nova mostra de unidade para defender unha causa que nos afecta a todos. Pero tamén quero deixar claro que esta non será a última mobilización. Mentres non haxa compromisos firmes e actuacións reais por parte da Administración do Estado, seguiremos convocando cantas accións sexan necesarias. O que está en xogo é a seguridade dos nosos veciños, dos peregrinos e de todas as persoas que utilizan esta estrada”.
“O que estamos esixindo é unha travesía urbana. Esta estrada xa non funciona como unha estrada convencional. Aquí conviven todos os días veciños de Mos e do Porriño, peregrinos, persoas que van aos comercios, aos seus traballos ou aos servizos da zona. A realidade da N-550 cambiou e a estrada ten que adaptarse a esa realidade.”
“O que pedimos é que nos escoiten, que atendan esta reivindicación e que se poñan á fronte dun problema que leva demasiado tempo sen resolverse. Levamos anos advertindo do perigo desta estrada. Non queremos ter que lamentar unha nova desgraza para que se actúe. O que está a pasar aquí vese todos os días”, expresou a rexedora.
“A veciñanza está farta e cansa de esperar. Por iso estamos unidos, apoiándonos uns aos outros, para reclamar ao Goberno de España unha solución definitiva para a N-550”, engade Nidia Arévalo. “Aquí non só pasan peregrinos. Todos os días vemos persoas maiores, cadeiras de rodas, carriños de bebés e centos de veciños que se desprazan a pé entre Mos e O Porriño. Non é razoable que teñan que facelo asumindo este nivel de risco”.
“Tamén hai proxectos pendentes desde hai anos, como o do Tablado de Louredo, que continúa paralizado. Hai veciños que seguen tendo que facer percorridos de varios quilómetros para acceder ás súas vivendas cando esa situación podería estar resolta desde hai tempo”, recalca.
“Estamos fartos, estamos cansos e non imos cesar nesta reivindicación ata que a N-550 deixe de ser un problema para a veciñanza e para os peregrinos”, afirma.
O Concello de Mos reitera a súa disposición a seguir traballando da man das administracións e dos colectivos implicados para impulsar medidas que permitan reducir a sinistralidade na N-550 e garantir un tránsito máis seguro para a veciñanza, os peregrinos e o conxunto das persoas usuarias desta vía.
Cabe destacar que a mobilización de hoxe enmárcase na liña de actuacións iniciada pola Comisión de Seguimento da N-550 e chega apenas uns días despois da concentración celebrada diante da Subdelegación do Goberno en Pontevedra para reclamar unha resposta ás reiteradas peticións de mellora da seguridade viaria formuladas polo Concello de Mos. Ante a ausencia de avances, a protesta trasladouse hoxe ao propio punto no que se produciu o último atropelo.
