— A cuarta convocatoria de compra pública de edificios pechou o pasado venres con este resultado global dos tres concellos
— Ángeles Vázquez salienta que as 7 ofertas recibidas na Coruña, o mesmo número en Tui e as 4 de Ribadavia “confirman que Galicia e os galegos apostan pola rehabilitación e que a Xunta proporciona as mellores ferramentas para conseguilo”
A Xunta de Galicia recibiu un total de 18 ofertas de adquisición de inmobles na Coruña, Tui e Ribadavia co fin de que, unha vez pasen a ser propiedade do Instituto Galego da Vivenda e Solo, sexan rehabilitados a través do programa Rexurbe.
Este foi o resultado global da cuarta convocatoria de compra pública de edificios por parte da Xunta que, despois dun prazo de tres meses para a presentación das propostas, pechou o pasado venres nos tres municipios, tal e como trasladou a conselleira de Medio Ambiente, Territorio e Vivenda, Ángeles Vázquez, nunha rolda de prensa na Delegación Territorial da Xunta na Coruña.
Os propietarios da Coruña presentaron 7 ofertas á Xunta, as mesmas que os de Tui, mentres en Ribadavia foron 4. Unhas cifras que, segundo a conselleira, “confirman que Galicia e os galegos apostan pola rehabilitación e que a Administración autonómica proporciona as mellores ferramentas para conseguilo”.
Segundo especificou, na Coruña unha das propostas pertence á Cidade Vella e o resto pertencen á zona de Orzán-Panaderas —coñecida tamén como A Pescaría—. “Agora comeza un proceso de revisión da documentación, para o cal traballaremos man a man cos propietarios”, subliñou Ángeles Vázquez.
Así mesmo, fixo fincapé en que o programa suporá un dobre beneficio para os tres concellos e para os seus veciños, pois as vivendas que se obteñan converteranse no fogar de familias que darán vida ao barrios e os locais destinaranse á implantación de iniciativas empresariais dinamizadoras da zona.
Cómpre lembrar que as vivendas resultantes cualificaranse de promoción pública (VPP) e pasarán a integrar o parque público residencial da cidade, adxudicándose en réxime de alugueiro a través do Rexistro único de demandantes de vivenda.
Tendo en conta os prezos de oferta presentados, a previsión é de que se supere o millón de euros contemplado para a cidade herculina —xa estaba prevista unha posible ampliación do orzamento— e, así mesmo, tamén o investimento para Tui e Ribadavia rolde os 250.000 euros que se dispoñían para estes municipios.
Desde a primeira convocatoria do programa Rexurbe, no ano 2018, a Xunta adquiriu xa un total de 76 inmobles en nove localidades galegas, dos cales prevense obter 131 VPP. Co fin de darlle continuidade ao esforzo realizado nos últimos catro anos, a conselleira engadiu que nos orzamentos de 2021 o seu departamento destina máis de 10 millóns tanto a rehabilitar o patrimonio edificatorio xa adquirido, como a mercar novos inmobles nos tres concellos mencionados.
Próximo paso: Área Rexurbe
Tras lembrar que este programa coincide coa filosofía e os obxectivos das chamadas Áreas Rexurbe, a conselleira aproveitou a visita á Coruña para animar ao Concello a seguir desenvolvendo esta figura, creada pola Lei de rehabilitación co fin de rexenerar e dinamizar de forma integral espazos públicos e axudar a captar axudas e investimentos privados para financiar actuacións de rehabilitación.
Neste sentido, cómpre subliñar que A Coruña foi o segundo municipio galego en declarar a súa propia Área Rexurbe, en xuño do ano pasado, e que esta coincide plenamente coas zonas onde se presentaron as ofertas —Cidade Vella e A Pescaría—. Así, Ángeles Vázquez recordou que o Concello ten pendente a presentación do plan de dinamización, a folla de ruta a seguir en canto a liñas estratéxicas de acción e necesaria para que a Área Rexurbe sexa unha realidade nesta urbe.
