▪ Construirase unha EDAR compacta mediante elementos prefabricados, incluíndo pretratamiento e tratamento primario e secundario; alén dun tramo de colector de 150m de lonxitude, que conecte a EDAR coa rede de saneamento existente
▪ Estas actuacións mellorarán o saneamento de 12 vivendas, estimando que se dará servizo a 40 habitantes/ equivalentes
José Antonio Quiroga, presidente da Confederación Hidrográfica do Miño-Sil CHMS), organismo autónomo dependente do Ministerio para a Transición Ecolóxica e o Reto Demográfico (MITECO), e José Manuel Alfonso, alcalde do concello pontevedrés das Neves, rubrican o Convenio de colaboración que posibilite a mellora do sistema de saneamento do barrio de Prado, un pequeno núcleo rural situado na parroquia de Santa María de Vide nas Neves.
O presente convenio determina as condicións para o financiamento, execución das obras e posterior entrega ao concello para o seu mantemento e conservación.
Problemática
O barrio de Prado, na actualidade, dispón dunha rede de colectores de saneamento nova, pero sen funcionamento ao non dispoñer dun sistema de depuración que permita a vertedura do efluente ao medio receptor coa calidade esixida; por outra banda, a EDAR do municipio conta cun emisario ao río Miño que, pola acción erosiva do río atópase ao descuberto e con risco de rotura.
Proxecto
A actuación proxectada consiste na construción dunha EDAR compacta mediante elementos prefabricados, incluíndo pretratamiento, tratamento primario e secundario; que se completará coa execución dun tramo de colector, de aproximadamente 150 m de lonxitude, que conecte a EDAR coa rede de saneamento existente.
O investimento necesario estímase en 110.000€, sufragada en porcentaxe 95/5, pola CHMS e polo Concello, respectivamente, para dar servizo a 12 vivendas, o que supón un total aproximado de 40 habitantes/ equivalentes.
“Desde a CHMS queremos destacar o noso firme compromiso de colaboración cos Concellos en proxectos que preserven e/o melloren a calidade das augas e os ecosistemas fluviais” concluíu Quiroga
