A alcaldesa de Mos, Nidia Arévalo, recibiu á directiva do Hockey Club Mos, encabezada por Jaime Pérez de Lis e Juan Vidal, para coñecer o proxecto deportivo co que a nova entidade busca impulsar a práctica do hóckey sobre patíns no municipio, especialmente entre os nenos e nenas a partir dos catro anos.
Durante o encontro, no que tamén estivo presente a concelleira de Deportes, Felisa Rodríguez, a directiva presentou unha iniciativa que aposta polo deporte de base, a formación e a transmisión de valores como o compañeirismo, a igualdade, a inclusión e o traballo en equipo. O club nace co obxectivo de incorporar esta disciplina á oferta deportiva local e crear unha comunidade arredor do hóckey sobre patíns.
A iniciativa abre unha nova vía para achegar o deporte de base á infancia de Mos, cunha proposta que combina aprendizaxe, actividade física e convivencia. Neste contexto, a colaboración entre as entidades deportivas, as familias e o Concello de Mos pode favorecer a difusión de novas disciplinas e ampliar as opcións deportivas para os máis pequenos.
Baixo o lema «Mos, un municipio sobre patíns!», o proxecto está impulsado por unha xunta directiva formada por nais e pais que traballan para consolidar unha proposta deportiva vinculada ás familias e á contorna educativa do municipio.
A entidade xa celebrou as súas primeiras xornadas de portas abertas no pavillón Patricia Martínez, cunha resposta que permitiu completar o primeiro grupo de adestramento. A demanda existente abre a posibilidade de crear un segundo grupo para facilitar a incorporación de máis participantes.
O Hockey Club Mos aposta por unha metodoloxía progresiva, adaptada ás idades dos nenos e nenas e centrada na aprendizaxe a través do xogo. Nas primeiras etapas, os adestramentos priorizan o equilibrio, a coordinación e a familiarización cos patíns, antes de avanzar cara á técnica e ao xogo en equipo. A proposta tamén promove a práctica mixta, para que nenos e nenas compartan a aprendizaxe en condicións de igualdade.
O proxecto contempla, ademais da colaboración co Concello, as ANPAS e os centros educativos para dar a coñecer o deporte e facilitar a participación das familias.
A identidade do club incorpora elementos representativos de Mos, como o Pazo de Mos, a rosa ou río Louro, nunha aposta por vincular o proxecto deportivo co patrimonio e coa identidade local.
As persoas interesadas en recibir información ou inscribir os seus fillos e fillas poden contactar co club a través do correo electrónico hockeyclubmos@gmail.com ou das súas redes sociais, en @hockeyclubmos.
