O BNG de Poio denuncia que o orzamento confirma a privatización total do ciclo da auga e a perda de control do Concello sobre o servizo

Redacción

Marga Caldas advirte de que o informe de Intervención recoñece a desaparición dos ingresos municipais por abastecemento e saneamento tras a adxudicación da concesión Alerta de que o Concello entrega a xestión e a recadación a unha empresa privada mentres impón á veciñanza un taxazo do 75,4% en tres anos

O BNG de Poio vén de denunciar que o novo orzamento municipal confirma a privatización total do ciclo integral da auga no municipio: as previsións de ingresos públicos correspondentes aos servizos de abastecemento e saneamento teñen desaparecido das contas do Concello. Así o recolle expresamente o informe de Intervención, un documento que segundo a voceira Marga Caldas deixa en evidencia o alcance da decisión do goberno de Ángel Moldes: “O PP non só entrega a unha empresa privada a xestión do abastecemento e do saneamento, senón que tamén lle cede os ingresos derivados do servizo. O Concello deixa de xestionar e controlar directamente un servizo básico e pasa a depender dun modelo no que a empresa concesionaria só ten como obxectivo gañar cartos e obter beneficios”.

O informe de Intervención sinala textualmente, ao analizar o capítulo III de taxas e prezos públicos, que este apartado do orzamento ten unha baixa do 42,58%, “fundamentalmente da eliminación das previsións iniciais nas taxas polos servizos de abastecemento e saneamento en virtude da adxudicación do novo contrato de xestión do ciclo integral da auga”. O documento explica que os ingresos pasan a establecerse mediante “prestacións patrimoniais de carácter público non tributario”, que non teñen reflexo orzamentario.

Para Caldas esta explicación confirma que o Concello renuncia a ingresar directamente os cartos que paga a cidadanía por estes servizos e deixa a recadación en mans da concesionaria, o que considera un cambio de modelo “de enorme transcendencia que o goberno de Moldes pretende despachar como unha simple cuestión técnica ou contable”, sostén.

A nacionalista advirte de que esta decisión supón perder capacidade de control público sobre un servizo esencial. “A auga é un servizo básico, non un negocio. Cando a xestión e os ingresos quedan en mans da concesionaria, a prioridade deixa de ser o interese público e pasa a estarcondicionada pola rendibilidade empresarial. Quen queda nunha posición de maior debilidade é a veciñanza, que non ten alternativa e está obrigada a pagar o que lle impoñan”.

O BNG subliña que a privatización está directamente relacionada co importante incremento que experimentarán os recibos a partir da entrada en vigor do novo contrato adxudicado a GestaguaPrace-Ingeser. Segundo os propios documentos municipais, a suba media será do 30% no primeiro ano e aplicarase outra do 34,96% no terceiro, calculada sobre a tarifa xa incrementada, o que supón unha subida acumulada do 75,4% en apenas tres anos.

A voceira do BNG considera especialmente preocupante que a concesión se prolongue durante 25 anos, hipotecando a capacidade de decisión dos futuros gobernos municipais sobre un servizo que debería estar sometido ao control público. Lembra tamén que, ademais das subidas xa programadas, o contrato contempla mecanismos de revisión de prezos que poden repercutir sobre os recibos novas subas extraordinarias.

Caldas lembra que o BNG advertiu de que as obras e investimentos comprometidos pola concesionaria tampouco son gratuítos, xa que a empresa recuperará eses custos a través dos ingresos do propio servizo. Fronte a este modelo, defende que o Concello debería ter explorado as posibilidades de financiamento autonómico, estatal e europeo para executar as actuacións necesarias na rede sen cargar todo o investimento sobre os recibos.
“Unha cousa é garantir que Poio dispoña das infraestruturas de abastecemento e saneamento que necesita e outra moi distinta é entregar durante 25 anos un servizo básico a unha empresa privada, permitir que recade directamente da veciñanza e facer recaer sobre as familias o custo das obras e a rendibilidade do negocio. Moldes foi elixido para xestionar Poio e defender os intereses da sua xente, non para vender o patrimonio e os servizos públicos”, insiste a voceira nacionalista.

Comparte este artigo