O concelleiro de Cultura e Turismo participou nos actos organizados na Coruña para honrar a súa figura
O concelleiro de Cultura e Turismo, Gonzalo Castro, participou esta tarde nos actos celebrados na Coruña para conmemorar o 75 cabodano de Alfonso Daniel Rodríguez Castelao, organizados conxuntamente pola Real Academia Galega de Belas Artes, a Fundación Castelao, a Xunta de Galicia e o Concello da Coruña. Na ofrenda, ademais de Castro, tamén participaron Miguel Anxo Seixas Seoane, presidente da Fundación Castelao, Manuel Quintana Martelo, presidente da Real Academia Galega de Belas Artes, Ricardo Cao, reitor da UDC e José López Campos, conselleiro de Cultura e Lingua.
“Castelao está máis vixente que nunca, pois está vivo en todos aqueles que defendemos a loita contra as inxustizas, a igualdade, a xustiza social e a convivencia entre os pobos”, sinalou Gonzalo Castro. Tras a ofrenda floral no busto dedicado a Castelao nos xardíns de Méndez Núñez, celebrouse tamén un roteiro guiado baixo o título ‘Memoria de Castelao na Coruña’.
Para finalizar a xornada, celebrouse a conferencia ‘Castelao: beleza e verdade’, impartida por Miguel Anxo Seixas Seoane na sede da Real Academia Galega de Belas Artes. “Hoxe é máis necesario que nunca reivindicar o pensamento político dunha persoa adiantada ao seu tempo, que desde unha visión cosmopolita e moderna buscou a integración na sociedade de todas as persoas”, engadiu Castro.
