O Concello de Oleiros celebrou unha nova edición do roteiro musical da Escola Municipal de Música, unha cita xa consolidada no calendario cultural do municipio que reuniu centos de veciños e veciñas arredor da música, a formación artística e a participación cidadá.
Ao longo da xornada, o alumnado e profesorado da Escola ofreceron diferentes actuacións musicais en diversos espazos de Santa Cruz, amosando o traballo desenvolvido durante o curso e convertendo as rúas e prazas nun escenario aberto á cultura.
O punto culminante da programación foi a representación do musical Aladdín, que congregou a centos de persoas na praza Esther Pita. A posta en escena destacou pola calidade artística, a implicación do alumnado e o traballo conxunto do equipo docente, ofrecendo un espectáculo cheo de música, cor e emoción que fixo gozar a persoas de todas as idades.
Desde o Concello de Oleiros quérese felicitar a todo o alumnado, profesorado e familias polo seu esforzo e dedicación, así como agradecer a participación do público, que contribuíu a crear un ambiente festivo e de convivencia durante toda a xornada.
A Escola Municipal de Música continúa a consolidarse como un referente na formación musical e na dinamización cultural do municipio, promovendo valores como a creatividade, o traballo en equipo e o acceso á cultura para toda a cidadanía.
O éxito desta edición do roteiro musical reafirma a aposta do Concello de Oleiros pola cultura e pola educación artística como ferramentas fundamentais para o desenvolvemento persoal e colectivo.
