Arredor do Día do Mercado, que este ano celébrase o sábado 31 de maio, a Concellaría de Feiras e Mercados ten programadas unha serie de actividades encamiñadas a poñer en valor a oferta comercial pero tamén a dar a coñecer os novos servizos que ofrece o mercado municipal.
O xoves 29 realizaremos a presentación da nova sala de lactación, un recurso que utilizan moitas mamás pero que aínda é descoñecido para moitas outras. E ademais de dar a coñecer o equipamento do espazo e as normas de uso, en colaboración coa Concellaría de Servizos Sociais, Igualdade e Sanidade complementaremos a xornada cunha charla de Fátima Varela Basalo, matrona e asesora internacional de lactación, que falará sobre distintos aspectos relacionados coa lactación e sobre os recursos públicos dispoñibles para as nais e as familias.
A charla empezará ás 17.00 horas no hall do mercado (acceso pola Gran Vía), con acceso libre e de balde para todas as persoas interesadas.
O mercado municipal acollerá tamén outras actividades ao longo do mes de xuño. Toma nota:
Día 3 (Sala de formación – 17.00 horas). Taller de herbas de San Xoán. Dentro da Semana do Medio Ambiente incluímos unha actividade que anticipa a chegada das nosas festas patronais, na que contaremos co Grupo Naturalista Hábitat para aprender a identificar e coñecer as características das herbas de San Xoán.
Inscrición: https://docs.google.com/forms/d/e/1FAIpQLSejg2KuaM666jJTZ2FHayNf2veVK-WubA5PpAeAjPX8G5lXaA/viewform
Día 9 (Sala de formación – 17.00 horas). Os servizos públicos en Galicia. Recuperamos a actividade do programa MercaEscola que non puido levarse a cabo por mor do apagamento eléctrico do día 12. Coñeceremos os nosos dereitos e obrigas como consumidores/as, onde podemos reclamar e como facelo.
Día 16 (Sala de formación – 17.00 horas). O coidado das plantas no fogar. Aprenderemos a escoller as máis axeitadas e como coidadas coa enxeñeira técnica agrícola e paisaxista Carmen Alonso.
