A deputada de Infraestruturas Públicas, Isabel Couselo, mantivo unha xuntanza con membros do Goberno e técnicos do Concello de Ponteareas para avanzar neste proxecto transformador que vai desafogar tráfico do casco urbano e mellorar as súas conexións
A deputada de Infraestruturas Públicas, Mobilidade e Contratación, Isabel Couselo, acaba de manter unha xuntanza de traballo con membros do Goberno e técnicos do Concello de Ponteareas para avanzar no proxecto do novo viario de conexión entre a EP-4001 Ponteareas-Guillade e a N-120. Trátase, en palabras da deputada, dun proxecto “transformador que vai desafogar tráfico do casco urbano e mellorar as conexións da vila”.
O obxectivo desta xuntanza, tal e como informou a deputada provincial, “foi escoitar e atender as prioridades do Concello de Ponteareas e pulir diferentes cuestións dun proxecto no que xa se está a traballar”. Neste eido, Couselo adiantou que a actuación, incluída no plan xeral de Ponteareas, vai ser redactada polo servizo de Infraestruturas da Deputación de Pontevedra.
Mediante a nova infraestrutura, tal e como informou Isabel Couselo, vaise conectar unha estrada provincial como é a EP-4001 cunha nacional. Ademais de desafogar o tráfico do casco urbano, con este viario de nova construción tamén se dotará de maior seguridade a unha contorna na que, nestes momentos, se atopan centros educativos de infantil, primaria e secundaria e se prevé a edificación dun centro de saúde.