A vicepresidenta primeira, Marta Nóvoa, asistiu ao acto de presentación dos proxectos das 11 mulleres participantes neste proxecto, cuxo obxectivo foi poñer en valor o talento senior á vez que fomentar a empregabilidade das mulleres maiores de 45 anos que actualmente supoñen a maior taxa de desemprego desde que hai rexistros, e o 60 % do desemprego total feminino
O Centro Cultural Marcos Valcárcel acolleu o Espazo Sinerxias no que Executivas de Galicia presentou as conclusións do proxecto “Xerando Redes +45”, no que colaborou a Deputación e cuxo obxectivo foi poñer en valor o talento senior á vez que fomentar a empregabilidade das mulleres maiores de 45 anos que actualmente supoñen a maior taxa de desemprego desde que hai rexistros, e o 60 % do desemprego total feminino.
Neste acto participou a vicepresidenta primeira da Deputación, Marta Nóvoa, quen felicitou á presidenta de Executivas de Galicia, Carla Reyes Uschinsky, por esta iniciativa, recalcou que o obxecto de “Xerando Redes +45” comparte as liñas estratéxicas marcadas no Goberno Provincial, “e por iso desde a Deputación non dubidamos nen un segundo en colaborar con este proxecto, e seguirémolo facendo para apoiar ás mulleres da provincia”, dixo, ao tempo que explicou que “somos plenamente conscientes da necesidade actual para mellorar o acceso ao mercado laboral das mulleres, sobre todo cando superan os 45 anos, levan máis dun ano en desemprego e atópanse en risco de exclusión”. De aí que Marta Nóvoa lembrase iniciativas nesa liña postas en marcha pola Deputación, como foi nova convocatoria provincial propia e exclusiva para mulleres en situación de vulnerabilidade, con 100.000 euros de orzamento neste ano, así como o EmprendOU en femenino, para axudar a aquelas mulleres que poñen en marcha os seus negocios.
Tal e como quedou de manifesto no acto desta mañá, o programa “Xerando Redes +45” baseouse en dous grandes obxectivos: promover a inclusión social e loitar contra a pobreza e calquera forma de discriminación; así como promover a inclusión activa, con vistas a promover a igualdade de oportunidades, así como a participación activa e a mellora da posibilidade de atopar un emprego para as mulleres maiores de 45 anos en risco de exclusión. Sempre, tal e como explicou a presidenta de Executivas de Galicia, Carla Reyes Uschinsky, desde o acompañamento “nun clima de confianza para dotar ás participantes de seguridade en si mesmas”.
O proxecto incluíu mentorías para as 11 mulleres maiores de 45 anos desempregadas participantes en “Xerando Redes +45”, formacións grupais, charlas inspiradoras, realización de prácticas non laborais en empresas e un networking final.
