Trátanse de recursos do Plan Extraordinario de Infraestruturas Deportivas que distribuíron xa preto de 1,7 millóns de euros entre 25 concellos da provincia de menos de 50.000 habitantes
A Deputación de Pontevedra acaba de aprobar unha nova axuda de preto de 50.000 euros ao abeiro do Plan Extraordinario de Infraestruturas Deportivas para o Concello de Valga. Con estes recursos, o Goberno local levará a cabo tarefas de acondicionamento da pista polideportiva interior do pavillón municipal da Baño, en Xanza.
O Concello de Valga dedicará estes recursos do Plan Extraordinario de Infraestruturas Deportivas a renovar o pavimento do pavillón que, nestes momentos, se atopa moi deteriorado e complica a realización das actividades deportivas que alí se realizan. A día de hoxe adestran na pista polideportiva de Baño varios clubs federados de fútbol sala, tenis e karate e tamén a emprega a Escola de Patinaxe Artística, así como diversos equipos afeccionados. Coa actuación financiada con recursos provinciais o chan de formigón pintado será substituído por un pavimento deportivo de linóleo acústico con tratamento antiestático que garantirá a boa realización das actividades e, ao mesmo tempo, a seguridade das persoas usuarias.
O Plan Extraordinario de Infraestruturas Deportivas da Deputación, dirixido aos 59 concellos da provincia de menos de 50.000 habitantes, mobilizou ata o momento preto de 1,7 dos 4 millóns de orzamento total, con achegas, ademais de para Valga, para A Cañiza, A Estrada, Arbo, As Neves, Baiona, Barro, Cangas, Catoira, Cerdedo-Cotobade, Covelo, Crecente, Fornelos de Montes, Gondomar, Lalín, Marín, Meis, Moraña, Pazos de Borbén, Poio, Redondela, Salceda de Caselas, Salvaterra, Vilaboa e Vilagarcía de Arousa.