Carmela Silva: “Que a retire xa e que pida desculpas. Está claro que non teñen coñecemento ningún porque é intolerable que o goberno galego ampare e permita unha campaña na que, unha vez máis, se pon o foco nas vítimas e non nos maltratadores”
O goberno da Deputación de Pontevedra esixiu hoxe “a retirada inmediata” da campaña de comunicación institucional da Xunta ao abeiro do 25N, que, segundo criticou a presidenta Carmela Silva, “debeu ser ideada por alguén que non ten ningún coñecemento sobre a igualdade e moito menos sobre as violencias machistas” .·”É intolerable –engadiu-, que o goberno de todas as galegas e os galegos idee, ampare e permita unha campaña na que, unha vez máis, se pon o foco nas vítimas e non nos maltratadores”.
A presidenta provincial amosou a súa “indignación” ante o contido da campaña e criticou que “está claro que o PP, goberne onde goberne, non ten coñecemento ningún, absolutamente ningún, sobre que é o sistema patriarcal o que xera as violencias e as agresións sobre as mulleres, e non o que fan as mulleres”. “As violencias machistas –afirmou – nacen dunha sociedade patriarcal que considera que as mulleres están nunha situación de inferioridade. Que non poden ser libres, nin tomar as súas propias decisións, que teñen que vivir en subordinación e teñen que ter control sobre a vida e a actividade que realizan. E xustamente esta campaña, en lugar de poñer o foco no maltratador, no asasino de mulleres, pona nas actividades que libremente teñen, poden e deben desenvolver as mulleres”.
Por esta razón, Carmela Silva reclamou amais da retirada de campaña, que a Xunta de Galicia “pida desculpas”. “É mellor non facer ningunha campaña que facer unha onde se pon no foco nas que somos agredidas nunha sociedade machista”, rematou.