Luis López salienta que o Plan +Provincia da Deputación mobiliza esta semana preto de 1,5 millóns de euros para 20 concellos

Estes novos recursos beneficiarán a Cangas do Morrazo, Crecente, Forcarei, Fornelos de Montes, O Grove, A Lama, Meis, Mondariz, Mondariz-Balneario, As Neves, Ponteareas, Ponte Caldelas, Pontecesures, O Porriño, Redondela, O Rosal, Silleda, Soutomaior, Tui e Vilagarcía de Arousa

O presidente provincial recordou que o Plan +Provincia destinou xa máis de 36 millóns de euros aos concellos de menos de 50.000 habitantes

A Deputación de Pontevedra acaba de aprobar en Xunta de Goberno destinar  preto de 1,5 millóns de euros para que Cangas do Morrazo, Crecente, Forcarei, Fornelos de Montes, O Grove, A Lama, Meis, Mondariz, Mondariz-Balneario, As Neves, Ponteareas, Ponte Caldelas, Pontecesures, O Porriño, Redondela, O Rosal, Silleda, Soutomaior, Tui e Vilagarcía de Arousa impulsen novos investimentos, afronten gasto corrente e redacten proxectos singulares para a transformación dos seus termos municipais a través das liñas 1,2 e 4 do Plan +Provincia 2025. O presidente provincial, Luis López, asegurou que a Deputación segue “avanzando, unha semana máis, no reparto de fondos do +Provincia, o plan de obras e servizos de competencia municipal máis ambicioso da historia da Deputación, que xa leva distribuídos  máis de 36 millóns de euros neste 2025 entre os concellos da provincia de menos de 50.000 habitantes”.

Dos recursos aprobados en Xunta de Goberno, máis de 1 millón de euros pertencen á liña 1, de investimentos, e serán dirixidos a trece concellos: Crecente, Forcarei, O Grove, A Lama, Meis, Mondariz, Mondariz-Balneario, Ponte Caldelas, O Porriño, Redondela, Silleda, Soutomaior e Vilagarcía de Arousa. Desta maneira, Forcarei recibe 112.900 € para a mellora da drenaxe, marxes e vías nos núcleos de Pardesoa, Malburgo e A Grela; Crecente preto de 9.000 € para o acondicionamento da fonte en Quinta Angudes; O Grove beneficiarase de 210.000 distribuídos en 187.000 € que servirán para completar os recursos recibidos do PON2030 (743.000 €) e financiar integramente cos recursos provinciais as instalacións deportivas das Bizocas, que ascenden a máis de 930.000 €, e outros 23.000 € para o acondicionamento de varios camiños municipais; A Lama recibirá máis de 24.500 euros para a adecuación no fogar residencial e no centro de día; Meis preto de 81.000 € para a eliminación da fosa séptica de Silvoso (72.000 €) e para a rehabilitación dun colector e a dixitalización de infraestruturas de saneamento (9.000 €);  Soutomaior preto de 44.000 € para a redacción do plan parcial do Polígono Industrial e Ponte Caldelas máis de 36.000 € para a mellora da eficiencia enerxética da Casa da Cultura.

Ademais, e tamén no marco da liña 1 do Plan +Provincia, Mondariz benefíciase de máis de 21.000 € para o acondicionamento dun camiño para a creación dun corredor verde para mellorar a conexión natural entre o centro urbano e as instalacións deportivas da Lagoa; Mondariz-Balneario de máis de 48.000 € para o acondicionamento do centro de interpretación do río Xabriña; O Porriño recibe máis de 57.000 e para o asfaltado de camiños en Devesa, Filgueiras e Portela de Souto; Redondela máis de 22.000 € para o acondicionamento do pavimento e da pista polideportiva do CEIP Porto Cabeiro;  Silleda máis de 252.000 € para a reforma da praza da Igrexa (192.000 €) e para a mellora dos centros sociais de Piñeiro, Lamela, Curro e Moalde (60.000 €); e Vilagarcía de Arousa preto de 98.000 € para a ampliación dos servizos de saneamento e abastecemento da rúa Ameal.

No que respecta á liña 2, de gasto corrente, apróbanse máis de 412.000 euros para financiar servizos municipais, festas gastronómicas e actividades culturais, deportivas e sociais en Fornelos de Montes, O Grove, A Lama, As Neves, Ponteareas e Soutomaior. E finalmente destinaranse máis de 60.000 € da liña 4 para a redacción de proxectos singulares de transformación da mobilidade, humanización e recuperación do espazo público en Pontecesures, Cangas, Tui e O Rosal.