· Luis Menor dálle a benvida ao proxecto do PP e destaca a súa experiencia na xestión municipal, a súa preparación e a súa proximidade aos veciños
· O candidato afronta esta nova etapa coa vontade de construír un proxecto baseado “na escoita, na proximidade e no traballo para dar resposta ás necesidades de Trives”
Aarón Álvarez será o candidato do Partido Popular á Alcaldía da Pobra de Trives nas próximas eleccións municipais. O presidente provincial do PP de Ourense, Luis Menor, mantivo un encontro con Álvarez, acompañado por concelleiros cos que conta actualmente o Partido Popular na corporación municipal, no que se formalizou a súa incorporación ao proxecto popular e a súa candidatura á Alcaldía.
Luis Menor deulle a benvida ao Partido Popular e destacou que se suma ao proxecto unha persoa “nova, preparada, con experiencia na xestión municipal e, sobre todo, cun profundo coñecemento de Trives e ganas de traballar polos seus veciños”.
“Aarón coñece desde dentro o funcionamento do Concello, ten experiencia, capacidade e vocación de servizo público e comparte con nós unha maneira de entender a política baseada na proximidade, na escoita e na procura de solucións”, sinalou o presidente provincial.
Menor destacou tamén a vontade do PP de construír arredor de Aarón Álvarez “un equipo forte e unido, capaz de sumar e de ofrecer aos veciños da Pobra de Trives un proxecto serio, responsable e con ambición de futuro”.
Experiencia na xestión municipal
Aarón Álvarez é graduado en Dereito pola Universidade de Vigo, con mención en Dereito Xudicial, e conta con experiencia profesional no ámbito da xestión pública e da atención á cidadanía, ademais doutros sectores vinculados ao contacto directo coas persoas.
Entre maio de 2023 e marzo de 2025 exerceu como tenente de alcaldesa do Concello da Pobra de Trives, cunha dedicación exclusiva ao cargo. Durante esta etapa participou directamente na xestión municipal, na representación do Concello en diferentes actos e na relación con outras institucións.
Tras xurdir diferenzas coa xestión municipal, decidiu renunciar á dedicación exclusiva e posteriormente dar un paso ao lado, apartándose da corporación. Unha decisión que adoptou desde a responsabilidade e a coherencia co compromiso adquirido cos cidadáns.
Álvarez afronta agora unha nova etapa coa vontade de volver traballar pola Pobra de Trives e poñer a experiencia adquirida ao servizo do municipio.
“Dou este paso con moita ilusión, pero tamén sendo consciente da responsabilidade que supón. Quero escoitar aos veciños, estar preto deles, coñecer os seus problemas e traballar para atopar solucións que melloren o seu día a día”, sinala.
O candidato popular considera que Trives precisa un proxecto capaz de sumar persoas e aproveitar todas as oportunidades para o desenvolvemento do municipio. “Quero contribuír a construír ese proxecto desde a proximidade, a empatía e o diálogo. Temos por diante moito traballo e afronto este reto con ganas de sumar e de traballar polo futuro da Pobra de Trives”, conclúe.
