A agrupación local realizará esta homenaxe na recuperación da súa comida anual dos socialistas vilagarciáns do 17 de maio.
Destacan o seu compromiso cos ideais socialistas e a adicación nos seus máis de 40 anos de militancia
A Comisión Executiva Municipal de Vilagarcía do PSdeG – PSOE acordou nomear a Ramiro Bandín Barreiro como Militante de Honra 2022 na celebración anual da agrupación que terá lugar o Día das Letras Galegas, 17 de maio. A Agrupación valorou a súa dedicación ao partido na súa dilatada militancia, desde xuño de 1977 ata a actualidade. Un compromiso que o levou a participar en ata nove executivas, xa desde os primeiros momentos da reconstitución da Agrupación, a finais dos anos 70 do século pasado ata algunhas máis recentes hai poucos anos.
O secretario xeral da agrupación local, Julio Torrado, valorou o nomeamento de Bandín como “unha vinculación da nosa xeración con aquela que nos ensinou o compromiso no seu valor máis alto”, e destacou que “Ramiro é un militante no máis puro sentido da palabra, pois é un debatidor nato dentro da casa e un defensor das nosas causas fora dela. Un home que sempre ofreceu e nunca pediu.”
Dende a agrupación socialista destacan o seu compromiso claro por impulsar a transformación dunha Vilagarcía que estaba nos anos 70 sen as instalacións e servizos que merecía, froito da longa noite de pedra que supuxo o franquismo. Corenta anos despois a labor silenciosa de militantes como Ramiro Bandín, organizada en torno aos socialistas, “debemos calificala como exitosa”. Especialmente, queren destacar os socialistas a súa vinculación e defensa de Vilaxoán, vila na que Ramiro naceu e residiu e que supón a principal inquedanza nas súas propostas e debates internos dentro do partido local. “É un vilaxoanés orgulloso”, destacou Julio Torrado en nome dos seus compañeiros e compañeiras.
A esta inquedanza social débese a súa participación en varias candidaturas, sendo concelleiro na oposición entre 1983 e 1991, acompañando a Seso Giráldez e Juan Antonio Pérez Callón nas súas respectivas candidaturas. Repetiría candidatura no 2011, xa en posicións simbólicas, sendo Modesto Pose o candidato á Alcaldía.
Desta maneira, Ramiro Bandín convertirase no décimo compañeiro da Agrupación de Vilagarcía en recibir a homenaxe como Militante de Honra, tras Seso Giráldez (2012), Rosina Villaverde (2013), José Recuna (2014), Manolo Cuervo (2015), Faustino Laya (2016) e Isaac Rodríguez (2017), Vázquez Fouz (2018), Juan Antonio Pérez Callón (2019) e Eliseo Barreiro (2020/2021).
A celebración deste nomeamento terá lugar durante a comida da agrupación, recuperada despois da pandemia para este ano, e que se desenvolverá o 17 de maio, día das Letras
Galegas, no Churrasco de Rubiáns. Os socialistas vilagarciáns convidan a participar no xantar a todas aquelas persoas que o desexen, tendo á súa disposición dous teléfonos
móviles nos que poder realizar a reserva: 693406373 e 687474600.
