• SON O ABANCA GANDAGRO INNOVA E O MÁQUINAS DESTACADAS CIMAG, CUXAS INSCRICIÓNS XA ESTÁN ABERTAS E PÓDENSE CONSULTAR NA PÁXINA WEB DO CERTAME
• ESTA CITA TERÁ LUGAR DO 2 AO 4 DE MARZO NO RECINTO FEIRA INTERNACIONAL DE GALICIA ABANCA
A IV Feira Profesional de Maquinaria, Agricultura e Gandería, Abanca Cimag-GandAgro 2023, que se celebrará do 2 ao 4 de marzo na Feira Internacional de Galicia ABANCA, premiará o último en tecnoloxía agropecuaria exposta no certame a través dos concursos Abanca GandAgro Innova e Máquinas Destacadas Cimag.
En canto ao Máquinas Destacadas Cimag premiará as innovacións en maquinaria que sobresaian por avances en deseño, prestacións e calidade do traballo, destacándose a maquinaria para produción de forraxes e, de maneira extensiva, a que vaia dirixida á agricultura que se desenvolve nas rexións do norte de España e Portugal. Poderán presentarse solicitudes ata o 20 de febreiro.
Respecto ao concurso GandAgro Innova, o seu obxectivo é premiar as innovacións destinadas a optimizar os recursos agrogandeiros que supoñan un avance ou mellora no ámbito dos medios de produción, transformación, comercialización ou para o desenvolvemento nas zonas rurais, nos sectores agrícola e gandeiro. Cada expositor poderá presentar propostas referidas a produtos, bens ou elementos, equipos e instalacións, sistemas e métodos, programas ou servizos ata o 17 de febreiro.
En ambos concursos as inscricións xa están abertas e poden consultarse na web www.cimag.gandagro.com.
Galardóns na última edición
Na pasada edición da feira, celebrada en febreiro de 2019, no GandAgro Innova resultou gañador o sistema automático de alimentación para gando vacún Lely Vector, presentado por Agrotec Entrecanales – Lely, sendo as mencións para o recuperador de calor para avicultura presentado por Rosber e para o carro para transportar e depositar grellas de formigón de Agrícola Cacheda.
Por outra banda, no Máquinas Destacadas Cimag, foron distinguidas 18 innovacións: unha cargadora telescópica Manitou presentada por Cardelle Hidráulica; unha picadora de forraxe autopropulsada de Claas Ibérica; un sistema de medida da lonxitude da fibra de carros mesturadores Visiomix, de Electricidad Mario; unha desenrolladora Rollpick Pro de Eurotechnics Agri; unha aboadora Amazone e un sistema de xestión intelixente en carros autopropulsados de Faresin, presentados por Farming Agrícola; un carro mesturador autopropulsado Storti e un inxector de parafuso sinfín, presentados por Fliegl Ibérica; unha minicargadora articulada multifunción Avant de Grupo Empresarial Torneiro; unha roto-encintadora John Deere de Maquinaria Agrícola do Noroeste; un aplicador de xurros mixto ALP de Maquinaria Agrícola Plumed; unha encintadora Alz para pacas redondas de Millares Torrón; un sistema de xiro variable en tractores de New Holland; unha trituradora abatible para pastos de Serrat Trituradoras; un anciño hilerador de Stirmot e tamén unha barra de tubos universal para a aplicación de xurro Mastek, unha rotoempacadora Pottinger e unha segadora con sinfín hilerador Pottinger, as tres de Durán Maquinaria Agrícola