As lonas da campaña pola Igualdade no Deporte xa locen nos pavillóns de Redondela cos lemas gañadores do concurso “E ti por que loitas?” . Foron as propias xogadoras e xogadores dos clubs os que propuxeron lemas para esta campaña co fin dar visibilidade á opinión da mocidade sobre as desigualdades presentes no deporte. A veciñanza votou entre as diferentes alternativas e os dous lemas gañadores foron: “Tod@s coa mesma pegada, o éxito é loitar pola igualdade” e “Como muller, nin un PASE atrás”.
As lonas xa están instaladas nos pavillóns municipais de Redondela e a Marisma. Onte venres representantes dos clubs Casa Paco e Sarillas, gañadores do concurso, participaron xunto coa alcaldesa, Digna Rivas, e os concelleiros de Igualdade e Deportes, Iria Vilaboa e Iván Valles, na colocación destas grandes pancartas “para conmemorar esta campaña e lembrar cada día a necesidade de seguir na loita pola igualdade en todos os ámbitos, tamén no deporte”. Desde o Concello de Redondela agradecen tamén a participaron nesta campaña doutros clubs como o CAR e o CPA Bolboreta.
