O alcalde Carlos Costa recibe a confirmación dos responsables sanitarios de que non volverá a haber cambios de facultativo mentras non se incorpore o médico con praza
Os veciños e veciñas de Campo Lameiro non se manifestarán esta sábado pola tarde, como estaba previsto, tras recibir o alcalde de Campo Lameiro, Carlos Costa, a confirmación con garantías suficientes de que non se volverá mover á medica que agora atende aos pacientes do Centro de Saúde mentras non se incorpore da súa baixa o médico titular da praza.
Este acordo foi tomado na Xunta de Portavoces polas tres formacións políticas con representación na Corporación Municipal, PPdeG, Porvir e PSdeG-PSOE que quixeron darlle un marxe de confianza aos novos responsables da Xerencia da Área Sanitaria de Pontevedra tras manter un par de reunións co alcalde, Carlos Costa, e de que conseguira do responsable sanitario o compromiso firme da estabilidade de facultativo en Campo Lameiro.
A concurrida concentración de protesta do pasado sábado e as numerosas reclamacións presentadas por escrito ante o SERGAS e o propio Concello para a súa tramitación ante as autoridades sanitarias respaldaron a reivindicación liderada pola Corporación Municipal que decidiu deixar de lado calquera posicionamento político para reclamar unha atención sanitaria digna, estable e continuada para os veciños e veciñas de Campo Lameiro.
MANTERASE O ESTADO DE ALERTA E VIXIANZA
A Xunta de Portavoces acordou tamén manterse en alerta e vixianza permanente para comprobar que o acordo se cumpre e que se lle dá certa tranquilidade e continuidade aos usuarios do Centro de Saúde de Campo Lameiro, sobre todo persoas maiores que veían como o cambio e as ausencias continuas na atención sanitaria estábase convertendo nun auténtico problema.
Os representantes das tres formacións políticas agradeceron, en primeiro lugar, aos veciños e veciñas de Campo Lameiro o apoio recibido ante as mobilizacións realizadas e manifestaron o seu desexo de darlle unha marxe de confianza aos responsables da Área Sanitaria de Pontevedra para que cumpran co compromiso acadado.