A distinción lograda este ano como Capital do Turismo Rural de España centrará a intervención do alcalde Carlos Costa neste escaparate turístico mundial.
O alcalde do Concello de Campo Lameiro, Carlos Costa, será o encargado de presentar os atractivos turísticos do municipio no transcurso da celebración da Feira Internacional de Turismo FITUR en Madrid dentro do stand da Xunta de Galicia e do seu programa “Galicia Parabéns”.
Campo Lameiro estará presente neste acto xunto aos concellos de Cambados e Baiona e no mesmo presentarase un vídeo elaborado para a ocasión cos principais atractivos turísticos do municipio ao tempo que se distribuirán folletos informativos e se manterá unha conversa cos turoperadores asistentes e público en xeral.
O Concello de Campo Lameiro participa nesta presentación da Xunta de Galicia en FITUR como gañador do concurso realizado por Escapada Rural en toda España que o acredita como Capital do Turismo Rural a través dunha votación popular aberta na que participaron milleiros de persoas en todo territorio nacional.
Carlos Costa expondrá as virtudes de Campo Lameiro como Capital Galega da arte Rupestre, “xa que somos o municipio coa área de maior concentración de petróglifos do mundo, dispoñemos dunha arte sacra incomparable con auténticas xoias do románico, temos infinidade de elementos de carácter etnográfico, muíños, cruceiros, petos de ánimas, capelas…; somos o balcón dos meandros do río Lérez e a nosa gastronomía, servida polos mellores establecementos hostaleiros da provincia, son a clave do éxito do turismo verde e familiar que nos permitiu ser elixidos este ano como Capital do Turismo Rural de España”, indicou o alcalde.
Para Carlos Costa di que en Madrid “si teño algo que destacar de Campo Lameiro non son nin as súas excepcionais paisaxes, nin as súas igrexas, nin as súas tradicións, nin as súas festas, nin a súa excelente gastronomía, etc. etc. se non aos seus veciños e veciñas, aos nosos paisanos e paisanas que son o auténtico secreto que paga a pena descubrir, coñecer, explorar e mesmo amar. Non hai unha soa persoa que visitase Campo Lameiro e regresase con indiferenza ao seu lugar de orixe. Esta visita representou nas súas vidas un antes e un despois”.
Finalmente, dixo que “modestamente, temos a virtude de facer que ninguén se sinta estraño entre nós e converter o noso pobo nunha segunda casa para aqueles que nos visitan que, na súa inmensa maioría, volven ou nos recomendan para pasar unhas vacacións distintas, diferentes, pero sobre todo indescritibles”.
