Con esta iniciativa o Concello convertiríase en impulsor dunha comunidade enerxética para abaratar o recibo da luz aos usuarios.
O alcalde do Concello da Lama, Jorge Canda, e o tenente de alcalde, David Carrera, presentaron ante a veciñanza da Lama nunha reunión realizada na Casa do Pobo tres proxectos de especial interese para os veciños consistentes na creación dunha comunidade enerxética fotovoltaica, a reforma do acceso á Alameda e a construción dun centro comercial municipal ubicado na parte superior do estacionamento.
Canda e Carrera informaron do proxecto de creación da comunidade enerxética fotovoltaica que pretende instalar paneles solares nos tellados dos edificios municipais para xerar enerxía que poida ser introducida na canle de distribución eléctrica e supoña unha importante redución do recibo da luz tanto para o Concello como para os veciños que decidan participar nesta iniciativa nun diámetro aproximado de 2 quilómetros desde o centro da vila.
Os paneis solares irían ubicados nos tellados de edificacións municipais como son o pavillón de deportes, a escola taller e mesmo o novo Centro Comercial Municipal que se pretende construir na parte superior do actual aparcadoiro existente no centro da vila.
Outra das actuacións presentadas ante a veciñanza foi o referido á mellora do acceso á Alameda que permitirá a súa unión coa rúa Igrexa, a un mesmo nivel, dentro dun proxecto que pretende contar co finanzamento da Deputación de Pontevedra dentro das liñas de axuda que favorecen a accesibilidade peonil como Ágora, por exemplo.
Este proxecto contempla a eliminación do peche perimetral actual pola rúa da Igrexa e a substitución por rampas e zonas escalonadas con desnivel suavizado para crear unha plataforma única dándolle maior amplitude á Alameda e unha mellor imaxe á rúa Igrexa.
Finalmente, Canda e Carrera presentaron o proxecto de construción dun Centro Comercial Municipal que iría colocado sobre columnas na parte superior do estacionamento, que linda coa rúa Pedreira, coa intención de conservar nos baixos os aparcamentos e crear na parte superior unha superficie duns 600 metros cadrados útiles para ser divididos, a demanda, entre aqueles emprendedores que quixeran instalar os seus negocios alí.
A parte superior iría dotada de paneis solares para autoabastecer enerxéticamente esta edificación e, a enerxía sobrante, incorporala ao proxecto da comunidade enerxética fotovoltaica municipal.
