• O dispositivo leva en funcionamento desde hai aproximadamente un mes e foi adquirido e instalado polo Concello a través de fondos propios, sumándose ao que se empraza nas inmediacións da Casa Consistorial, na Praza da Constitución
• O alcalde, Manuel Campos, lembra que a vila foi das primeiras da comarca en habilitar este servizo, que sirve para reafirmar o compromiso de Cuntis coa eficiencia enerxética e a sostibilidade
Xa está en funcionamento, desde hai aproximadamente un mes, un segundo punto de recarga para vehículos eléctricos en Cuntis. O alcalde, Manuel Campos, lembra que xa se pode facer uso desde hai varias semanas do dispositivo habilitado na rúa Xoán Xesús González, onde se habilitaron dúas prazas de estacionamento específicas para realizar a recarga. Esta actuación levouse a cabo con fondos propios, cun investimento aproximado duns 12.000 euros.
Deste xeito, o punto de recarga instalado neste emprazamento súmase ao que xa leva operativo desde 2021 na Praza da Constitución, nas proximidades da propia Casa Consistorial. Daquela, o Concello de Cuntis fora pioneiro á hora de apostar por este tipo de sistema de alimentación para vehículos eléctricos entoda a comarca. Esa primeira actuación fora subvencionada a través dunha axuda conseguida a través do Programa Estatal de Incentivos a la Movilidad Eficiente y Sostenible (MOVES). “Este Goberno local sempre tivo o compromiso firme de apostar polas enerxías eficientes e sostibles, respectuosas co medio ambiente e que cumpran cos parámetros que marca a Axenda 2030”, apuntou o alcalde Campos Velay. Con este tipo de actuacións, búscase impulsar a mobilidade con enerxías limpas e alternativas, reducindo as emisións de dióxido de carbono e dando a coñecer este tipo de tecnoloxías entre a poboación. Neste sentido, Manuel Campos explica que contar con estes sistemas de recarga “non só supón un aliciente para a cidadanía á hora de adquirir este tipo de automóbiles, senón que tamén facilita incrementar o número de vehículos destas características do parque móbil municipal”.
O Concello de Cuntis aposta pola eficiencia enerxética de maneira firme. Non hai que esquecer que, ademais da dotación destes puntos de carga para vehículos, nos últimos anos tamén se obtiveron fondos para a renovación do alumeado público, pasando a contar con luminarias ‘led’, o que supón unha mellora do servizo e un importante aforro no consumo.