O alcalde e o concelleiro de Deportes mantiveron un encontro co deportista do Kick Boxing Club Arcade para recoñecer a súa participación na cita mundialista celebrada en Italia.
O alcalde de Soutomaior, Manu Lourenzo, e o concelleiro de Deportes, Gonzalo Outeiro, recibiron no salón de plenos do Concello a Cael Andrew, deportista do Kick Boxing Club Arcade e vixente campión de España, tras a súa participación no Campionato do Mundo júnior de kickboxing disputado en Jesolo (Italia).
Andrew, de 17 anos, rematou na quinta posición da categoría de menos de 57 quilos, quedando ás portas das medallas nunha competición que reuniu miles de deportistas de 60 países. O representante do club de Arcade caeu ante o británico Michael Wyatt, que posteriormente se proclamou campión do mundo.
Nado en Malaisia en febreiro de 2009, Cael reside en Arcade desde os tres meses de idade e leva anos vinculado ao deporte local. A súa actuación no Mundial consolida a súa proxección nunha disciplina na que xa acadou o título estatal.
Durante a recepción, Manu Lourenzo felicitou o deportista polo resultado e polo traballo realizado para chegar a unha competición deste nivel. «Cael é un exemplo do talento e do esforzo que temos no deporte local. Competir nun Mundial con deportistas de 60 países e quedar ás portas das medallas é un logro do que debemos sentirnos orgullosos en Soutomaior», sinalou o alcalde.
Lourenzo tamén puxo o foco no papel dos clubs e das persoas que traballan no deporte de base: «Detrás destes resultados hai moitas horas de adestramento, compromiso e dedicación, tanto por parte dos deportistas como dos seus adestradores. Desde o Concello queremos recoñecer ese traballo e seguir apoiando o deporte e as entidades que fan posible que a nosa veciñanza medre tamén a través del».
O adestrador de Cael, Manuel Álvarez, destaca del a súa capacidade técnica, rapidez e habilidade, así como a variedade de recursos que emprega tanto en ataque como en defensa.
O Concello de Soutomaior trasladoulle os seus parabéns polo resultado acadado e animouno a continuar traballando para afrontar novos retos deportivos.
