A mostra inaugurarase o luns 5 de outubro ás 10:00 horas na Casa da Cultura de Portas, dentro do percorrido do proxecto polos concellos vinculados ao Camiño de Santiago.
A Federación pola Igualdade das Mulleres da Provincia de Pontevedra (FEMUPO) continúa o percorrido do proxecto “Mulleres FEMUPO, mulleres que fan Camiño”, unha iniciativa cultural, educativa e social que está a achegar a diferentes concellos da provincia as historias de mulleres e entidades que abriron camiño en distintos ámbitos da sociedade.
O vindeiro luns 5 de outubro, a exposición chegará a Portas, onde terá lugar a súa inauguración oficial ás 10:00 horas na Casa da Cultura de Portas.
A mostra forma parte dun proxecto que conecta igualdade, referentes femininos, territorio e valores do Camiño de Santiago, utilizando as traxectorias das galardoadas nos Premios Mulleres FEMUPO como ferramenta para visibilizar o talento feminino e ofrecer referentes próximos á cidadanía.
A exposición está composta por sete paneis: un primeiro panel de presentación e contextualización do proxecto; cinco paneis dedicados ás diferentes edicións dos Premios Mulleres FEMUPO, de 2022 a 2026; e un último panel con códigos QR que permiten acceder a vídeos e outros contidos dixitais.
Ao longo destas edicións, FEMUPO recoñeceu mulleres, colectivos e entidades vinculadas á cultura, deporte, empresa, administración e asociacionismo, poñendo no foco historias que contribúen a construír unha sociedade máis igualitaria.
O proxecto parte dunha idea fundamental: os referentes importan. Coñecer mulleres que romperon barreiras, lideraron iniciativas, emprenderon, crearon ou contribuíron ao ben común permite ampliar as posibilidades que outras mulleres e, especialmente, as novas xeracións poden imaxinar para o seu propio futuro.
“Poñer a mulleres referentes no foco é un gran paso. Queremos que as súas historias non queden só nun recoñecemento, senón que se convertan en exemplos capaces de inspirar e abrir camiño a outras persoas.”
FEDERACIÓN POLA IGUALDADE DAS MULLERES DA PROVINCIA DE PONTEVEDRA (FEMUPO)
Ademais da exposición, “Mulleres FEMUPO, mulleres que fan Camiño” incorpora talleres e actividades participativas arredor da igualdade, os referentes femininos, a corresponsabilidade, os hábitos responsables e o coidado do territorio.
Entre estas propostas destaca “As mulleres que fan o noso Camiño”, unha dinámica coa que as persoas participantes identifican mulleres referentes das súas propias vidas, demostrando que os referentes tamén están nas nosas familias, barrios, asociacións e comunidades.
A chegada a Portas supón unha nova parada dun proxecto que percorre diferentes concellos vinculados ao Camiño Portugués e ao Camiño Portugués pola Costa, achegando á cidadanía unha mensaxe clara: cada historia conta, cada referente deixa pegada e cada paso pode contribuír a construír unha sociedade máis igualitaria.
Porque cada paso que damos xuntas constrúe un camiño máis igualitario. “Mulleres FEMUPO, mulleres que fan Camiño” está impulsado pola Xunta de Galicia a través do programa O Teu Xacobeo.
