O concello de Pazos de Borbén destaca o éxito de audencia e o retorno económico do paso da Volta Ciclista a España polo municipio

- Anuncio -

A retransmisión do paso da proba polo concello chegou a máis de 190 paises de todo o planeta
Case 4 millóns de espectadores seguiron a través das canles de Radio Televisión Española o desenvolvemento da penúltima etapa da volta ciclista a España. “Unha cifra que pon de manifesto a extraordinaria visibilidade que esta clase de probas achegan a municipios pequenos como o noso”, explicou o alcalde de Pazos de Borbén, Andrés Iglesias, tras o paso da Serpe Multicolor polo concello o pasado sábado.
Así, o equipo de goberno do Concello de Pazos de Borbén valora de forma moi positiva a promoción do municipio obtida grazas ao paso da Volta Ciclista. “As imaxes do paso da Volta polo noso municipio chegaron a millóns de persoas de máis de 190 países de todo o mundo. É unha difusión desorbitada que sen dúbida terá unha gran repercusión económica no municipio”, explicou Iglesias.
Do mesmo xeito, o rexedor remarcou o apoio de toda a veciñanza do municipio durante o paso da proba. “Todos os veciños envorcáronse en engalanar o percorrido e apoiar aos deportistas ao seu paso”, explicou Iglesias, ao que engadiu que “este sábado máis medio planeta puido comprobar a xenerosidade, a amabilidade e a implicación de todos os veciños de Pazos de Borbén. Demos a mellor imaxe posible como municipio, e iso é impagable”, finalizou o edil.