O acto, aberto e ao aire libre e ao que o goberno local convida a toda a veciñanza, será este sábado ás 12 horas e contará cunha actuación musical
O Concello de Vilaboa celebrará este sábado ás 12 da mañán un pequeno acto de inauguración do Forno do Cal, un espazo recuperado para o desfrute veciñal a través do GALP.
O Concello convida a toda a veciñanza de Vilaboa a asistir a este homenaxe público a todas as persoas que dalgún xeito estiveron ligadas a este entorno e sobre todo ás persoas traballadoras neste forno, moitas delas falecidas xa pero que estarán representadas por algún familiar.
O acto, que será ao aire libre e totalmente aberto, contará coa actuación musical de Ceci e Miguel.
Cabe recordar que o Forno do Cal é un elemento singular do patrimonio industrial de Vilaboa situado en San Adrián de Cobres que antes da actuación estaba oculto pola maleza e que grazas a unha actuación xestionada a través do GALP foi recuperado.
Nos últimos meses escolares dos centros de Vilaboa visitaron este entorno para familiarizarse con esta parte da historia local.
O proxecto incluiu a rehabilitación da estrutura, o acondicionamento do entorno e a posta en valor do mesmo cun orzamento inferior aos 100.000 euros e que precisou os permisos sectoriais de Costas, Medio Ambiente e Patrimonio.
O Forno do Cal está situado nunha parcela propiedade da empresa Pescapuerta, que cedeu o uso e os terreos para proceder á rehabilitación. O Concello asinou tamén un acordo coa Comunidade de Montes de San Adrián para a cesión dos terreos colindantes para o acondicionamento da zona que vai desde a Ponte de Rande ata a Punta de Atravesada.
